Yew raşteyo ke tewr zêde raştê hêrişê îqtîdarî yeno raşteyê kulturî yo. Vera heme tedayan xebata înan dewam kena. Înan raşteyan ra yew zî tîyatroyê Bajarî yê Amedî yo û bê maben xebatan rayîr ra beno yo. Tîyatroyê Bajarî yê Amedî bernameyê xo yê aşma ewil ê serra 2024î dekerde derbaz kerd.
Kaybaza Tîyatroyê Bajarî ya Amedî Berfîn Emektare derheqê xebatanê xo de qisey kerd.
Berfîne da zanayîş ke serra 2023yî de hunerê Kurd berardişêk gird kerdo la vera tedayan de ameyo kerdiş. Berfîne qedexeyê bernameyan vist vîr û wina vat: “Tewr peynî bernameyê serrgêra Merkezê Kulturê Mezopotamya yê Stenbolî nisîbê xo nê ra girewt. Ma xebatê xo nêdanî vindarnayîş û rayîr ra benî. Sey Tîyatroyê Bajarî yê Amedî ma bernameyê aşma Çeleyî vet. Bername bi ‘Mergê Jeanne D’arce Ya Din’ dest pê kerd. No hewte ‘Çînur’ yê kayê Teatra Va bî est bî. Hewteyê bîn ma do bi ‘Dek û Dolabê Scapen’ bivejî vernîya temaşevanan. Kayê koma tîyatroyê Êlihî ‘Qral û Travis’ est bî. Bernameyê komê herêmî yê Amedî do bibî. Keyê tîrkî yê ‘Doktorê zerrîwaştox yê bê zerrî’ do bibo. Kayê ‘Morî’ yê Tîyatroyê Maskî do bibo. Bernameyêke pir û dekerde vernîya ma de yo.”
‘Ma paştîdayîşê xo şarî ra gênî’
Berfîne wina dewam kerd: “Emserr ma do hem Tirkîya û hem zî Kurdistan de xeylê xebatan bikerî. Amed de her tim temaşevanê tîyatroyî est î. Ma hêzê xo şarî ra gênî. Ma turneyê Ewropaye pê anî. Ma 3 welat û 8 bajaran gêrayî û ma kayê ‘ Mergê Jeanne D’arce Ya Din’ kay kerd. Eleqeyêk gir dest bî. Ma 12-13,14î de Wan de bî. Aşma Sibate de bernameyê Şirnex û Elezîzî est o. Aşma Adare de turneyê ma yê Ewropa est o. Aşma Çeleyî de kayê Zazakî yê ‘Wewremerdim’ do bêro kaykerdiş. Heskerdişê tîyatroyî domanîye ra destpê keno. Coka ra zî xeylê ercaye yo ke doman bi ziwanê xo tîyatro temaşe bikerî.”
‘Ma rojeva şarî ra xoser nîyî’
Berfîne qiseykerdişê xo yê peyênan de vat: “Ma domanê nê şarî yî. Ma rojeva şarî ra xoser nîyî. Rojeva şarî çi bibo, aye rojeva ma de yo zî û ma rojeve ra berardiş kenî. Çend roj verê cû deklerasyonê ‘venga aştîye’ ame weşanayîş. No veng nuştox û roşvîran ra ame û xeylê ercaye bî. Ma do paştîdayîşê xo dewam bikerî. Ma domanê nê şarî yî.” AMED
