Vizêr bajarê Sine de bi zîyaretê serekkomarê Îranî Îbrahîm Reîsî de tedbîrê şîdetin yê asayîşî ameyî girewtiş. Wextê zîyaretê Reîsî de merasîmê çewresî yê Ramîn Fathîyî ke wextê destbendkerdişî de pê îşkence ameybî qetilkerdiş, pê ame.
Bajarê Urmîye û Kamyaranî de zî bi şeklê cîya cîyayî çalakî dewam kenî û welatîyan nêrazîbîyayîşê xo ardî ziwan ser. Yeno vatiş ke Bokanî de hêzêk zêde ameyo vilakerdiş. Sewbîna bajar de tepiştiş û destbendkerdişê welatîyan bajar de dewam keno.
Çalakgerê Rojhelatê Kurdistanî vanê, çalakîyanê di hewteyê peyênan de Bokanî de tewr kêmî 17 kesî hetê hêzê Îranî ra ameyî kiştiş û aqubetê bi desan kesan zî nîno zanayîş.
Pêroyê Îranî de taybet Tahran de şar reyna vejîya raşteyan û bê maben sloganê hemverê dewleta Îranî berz kerd. Bajarê Zahîdanî de seba pawitişê şexsîyetê olî yê Beluç Mewlewî Ebdulhemîdî çalakîyêk pê ame û ci sey xeta sûre îlan kerdî. Eynî bajarî de yeno pawitiş ke ewro roja Îne çalakîyêk bêra viraştiş. Seba aye vizêr ra nata hûmarêk zêde ya pasparan bajêr de ameya vilakerdiş.
Bajarê Tahran, Tewrêz, Esfehan, Bender Ebasî de wendekarî raşteyan de bî. Hetobîn de eynî bajarî de şofêr û karkerî grevê xo dewam kenî û çalakîyan virazenî.
Ercayeyê vatişîyo ke 29ê Teşrîna Peyêne ya 2022î de Rêxistina Heqê Merdiman ya Îranî eşkera kerd ke destpêkê çalakîyanê Îran û Rojhelatê Kurdistanî de tewr tay 448 kesî ameyî kiştiş û înan ra 60ê ci doman û 29ê ci zî cinî yî.
Tewr zêde hedîseyê kiştişî bajarê; Sîstan Beluçistan, Sine, Azerbeycana rojava, Mazenderan û Kirmaşanî de bîyî.
