Serewedarnayîşê Şarê Rojhelatê Kurdistan û Îranî yê hemverê qetilkerdişê cinîya kurde Jîna Emînîye û hemverê sîstemê dewleta Îranî bêmaben dewam keno. Badê aliqnayîşê çalakgeran hema heme pêro bajaran de şar herikîya raşteyan û çalakîyan pê ard.
Vizêr dewa Zêwke ya bajarê Pîranşarî de merasîmê çewresî yê çalakgerêk bi tewrbîyayîşê keye û hemwelatîyan pê ame. Bajarê Dereşar yê Îlamî de zî vizêr şewe hemwelatîyî adir verdayî fotografê selahîyetdarê Îranî.
Bajarê Îranî yê Zahîdanî de zî bi seyan kesî herikîyayî raşteyan û hemverê îqtîdarî de rayraşîyayîş pê ardî. Cinîyan rayraşîyayîş de bê maben sloganê ‘Jin, jiyan, azadî’ berz kerdî.
Bajarê Çebehar, Xaş, Zehek, Îranşarî yê parêzgeha Sîstan û Beluçistanî de çalakîyê nêrazîbîyayîşî amayî viraştiş. Aliqnayîşê çalakgerê bi nameyê Muhsîn Şikarî ke hetê rejîmê Îranî ra ame aliqnayîş, hem mîyanê Îranî de û hem zî tebere Îranî de bî sebebê nêrazîbîyayîşan. Kirmaşanî de zî rayraşîyayîşêk bêveng ame viraştiş la hêzê Îranî hêrişê şarî kerd û xeylê kesî birîndar bîyî.
Xeylê herêmanê Tahranî de zî bi tafînayîşê muman û çalakîyê cîya cîyayan hemwelatîyî nêrazîbîyayîşê xo yê hemverê aliqnayîşê Muhsîn Şikarî ardî ziwan.
Rojhelatê Kurdistanî de seba dayîka hunermende Saman Yasîne ke ameye tepiştiş û cezaya aliqnayîşî dîyaye aye, veng dîya Rêxistina Heqê Merdiman ke seba betalkerdişê cezaya aliqnayîşî bikewa mîyanê têgêrayîş. Dayîka Samane vat: “Tu cayêk dinyayey de çîyêk winasî nêameyo dîyîş ke kesêk verê adirê tenekeyî de cezaya aliqnayîşî bidîya. Veng dana her kesî ke seba pawitişê canê lajê mi her çî bikerêne.”
Ercayeyê vatişîyo ke vizêr ame dîyarkerdiş ke bajarê Dehgulan yê Rojhelatê Kurdistanî de ciwanê bi nameyê Şademan Ehmedî bado ke ame destbendkerdiş pê îşkence ame kiştiş.
