Rojnameger Azîz Orûç di 11’ê kanûna 2019’an de li navçeya Bazîdê ya Agiriyê hatibû binçavkirin û piştî çend rojan hatibû girtin û ew şandin Girtîgeha Tîpa L a Panosê. Danişîna duyemîn a doza Orûç îro li 2’yemîn Dadgeha Cezayê Giran a Agiriyê hat dîtin.
Muhammet Îkram Muftuoglû û Abdullah Elek ên danişîna ewil ji dozê hatin berdan beşdarî danişînê bûn. Dîcle Muftuoglû, Turgay Îlboga û Yucel Îlhan ên negirtî tên darizandin beşdarî danişînê nebûn. Rojnameger Orûç jî ji Girtîgeha Panosê bi rêya dîmen û deng (SEGBÎS) beşdarî danişînê bû. Parêzerên Orûç di danişînê de amade bûn.
Bi hinceta vîrûsa koronayê nehiştin rojnameger danişînê bişopînin.
Orûç di danişînê de parastina xwe kir û beyanên xwe yên berê dubare kir û got ku ji ber şewba vîrûsê jiyana wî bi xetereyê re rûbirû ye û anî ziman ku têkiliya wî bi tu rêxistinê re nîne.
Şandeya dadgehê biryara dewama girtina Orûç da û danişînê taloqî 9’ê mijdarê kir.
Dadgehê derbarê yên negirtî tên darizandinê de jî tevdîra kontrola edlî rakir. AGIRÎ
