Midurê Karê Nivîsan ê Ajansa Mezopotamyayê (MA) Ferhat Çelîk, di çarçoveya lêpirsîneke ku ji aliyê Serdozgeriya Komarê ya Dîlokê de duh li mala xwe ya li navçeya Şîşlî ya Stenbolê ji aliyê polîsan ve hatibû binçavkirin û sûcdariya ‘propagandaya rêxistinê’ lê hatibû kirin, di nav rojê de sewî Edliyeya Çaglayanê hat kirin. Çelîk li vir bi SEGBÎS’ê îfade da dozgeriyê û nûçeyên ku di navbera mehên tebax û îlonê de hatine weşandin hê hatin pirsîn.
Nûçeyên ku derbarê tecrîda li ser Rêberê Gelê Kurd Abdullah Ocalan, avêtina welatiyan a ji helîkopterê û JÎTEM’ê de hatine weşandin ji Çelîk hatin pirsîn. Çelîk sûcdariyên ku di ser van nûçeyan de lê hatin kirin red kir û diyar kir ku di nûçeyên wan de hêmayên sûc tune ne, bi armanca agahdarkirina civakê nûçe amade kirine û daxwaza berdana xwe kir.
Dozgeriyê piştî ku îfadeyê wî girt Çelîk bi daxwaza qedexeya derketina derveyî welat sewqî Dadgeriya Ceza ya Silhê kir. Dadgeriyê, daxwaza dozgeriyê ya ji bo qedexeya derketina derveyî welat qebûl kir û Çelîk berda.
Piştî berdana xwe bi hinceta ku derbarê wî de lêpirsîneke din hatiye destpêkirin polîsan careke din Çelîk binçav kir û wî birin Miduriyeta Emniyetê ya Şîşliyê. STENBOL
