Hêrişê bi hetkarîya AKP-MHPyî û PDKyî de ke 17ê Nîsane de hemverê Mintiqaya Federe ya Kurdistanî ke mintiqayê; Zap, Avaşîn û Metînayî de ameyî destpêkerdiş no mengêke zêdeyêrî yo domneno û duştê şerî de zî her hetî ra reaksîyonî yenê mojnayîş. Hêrişî bi hetkarîya hukmatê Iraqî di Şengal, Mexmûr û Rojhelatê Sûrîyeyî de zî amebî destpêkerdiş. Duştê sîyasetê AKP-MHPyî de DYA; Rusya, Îngîlîstan, Fransa û Almanyayî ra reaksîyonêke nêame ramojnayîş û NYyî zî rolê xo kaynêkerd.
‘Cinîyan ra mektûbê akerdeyî’
Bi serekîya Kongreya Starî xeylêk rojnamegerî, nuştoxî, rêxistinê cinîyan duştê şerî de mektûbêke akerde şawitî Sekreterîya Pêroyî yê NYyî rê û rêxistinê cinîyan rê. Cinîyê namdarî yê dinya seke Jûdîth Bûtler, Sîlvîa Federîcî û Angela Davî zî îmza eştê mektûbe û bale antî serê hêrişan û vatî nê hêrişî nêbenê bêrê qebûlkerdiş. Cinîyan vatî, ê bêvengîya NYyî qebûl nêkenê û ganî mekanîzmayê duştê nê şerî de bikerê ciwîye.
Rojnamegere û rejîsora Îtalyane Benedetta Argentîerî ke îmza eşt mektûbe û serra vîyarteyî de di ‘Gemîya Azadîyî’ ya seba azadîya Rayberê PKKyî Abdullah Ocalanî de ca girewt, derheqê babete de ajansê ma rê erjnayîş kerd.
‘Hedefo asasîyê operasyonan Kurd ê’
Benedetta malûmat da ke no şer duştê Şarê Kurdî û şarê mintiqayî de yo û wina dergî dayî qiseyanê xo: “Famkerdiş û eşkerakerdişê nê xeylêk muhîm o. Eke no nêro famkerdişî ke sûcê dewleta Tirkî zî nînê famkerdiş. Vera ke kesêke Sîncarî ra yan zî Mexmûrî ra demêk cîya de di cayêke bi SÎHAyê Tirkî biameyêne qetilkerdiş no çîyêke xeylêk bi ters yenê vînayîş. Bêşik hedefê ê hêrişan Şarê Kurdî yê. Tirkîya Rojhelatêke aştîyane nêwazena. Eksê nê wazena.”
‘Tayyîp Erdogan dimayê serkewtişî yo’
Benedetta qal kerd ke Serekkomar Tayyip Erdogan verîyê weçînayîşê pêroyî wazeno bi şer bireso serkewtiş û wina da zanayîş: “Welat de krîzê ekonomî aver şîyo. TL duştê Dolarî de se ra 44 erjê xo vindî kerdo. Enflasyon zî se ra 77 o. Erdogan seba nê apeyşîyayîşî binimno verê her kesî dayo şerî.”
‘Naskerdişê têkoşînê azadîya Kurdî’
Benedetta dîyar kerd ke 2014î ra heta nika nizdîyî ra hereketê azadîya Kurdî dir eleqedar bena û la zêde wayîrê malûmatî nêbîya û nê erjnayîşî kerd: “Dimayê ke ez şîya Rojawan, bîya wayîrê îmkanê ke beyanatan bifînî dest. Ez duştê azadîya Kurdî de heyran menda. Rexnekerdişê modernîteya kapîtalîstî û yê tewr muhîm zî alternatîfê Konfederalîzmê Demokratîkî yê seba heme dinya ameya pêşnîyazkerdişî, bala mi ant.”
‘Tirkîya sivîlan qetil kena, sîlehê qedexeyî xebetnena’
Benedetta wina dergî da qiseyanê xo: “Tirkîya hemverê Mintiqaya Federalî ya Kurdistanî de sîlehê kîmyewî xebetnena û rayaumûmîya mîyanneteweyî duştê nê de bêveng a. Goreyê welatan standartê cîyayî yenê ca. Çîyê Kurdistan de yenê ciwîyayîş babetê Ukraynayî ra cîyayêrî nîyê. Tirkîya welato bîn îşxal kena û şarê mintiqa çinî kena. Sey Rusyayî Tirkîya zî sivîlan qetil kena û sîlehê qedexeyî xebetnena. Tirkîya hem krîzê multacîyan û hem zî cayê xo yo sey endamîya NATOyî xebetnena û coka nê kes mudaxale nêkeno. Rayaumûmîya dinya zî dûrî û nizdî bena.”
‘Tecrîdê Îmralî eksê merdimîyî yo’
Benedetta bale ante serê tecrîdo girano ke 23 serrî yo serê Rayberê PKKyî Abdullah Ocalanî de yeno kerdiş û di na babete de wina reaksîyon ramojna: “Tecrîd her ke şino giranêr beno. Demêke derg merdimêk binê tecrîdî de girewtiş, eksê medimî yo. Na rewşe di Siraya 7ine ya Metodê Standardê Asgarî ya NYyî de Derheqê Caardişê Hemverê Tepisteyan de sey îşkenceyî yena şinasnayîş. Abdullah Ocalan di 20 serran de bi desan reyî veng a pêvînayîşê aştî kerd, adirbest kerd. La AKP çareserî nêwazeno, eksê nê şer keno. Hêriş keno. No merdimî keno qaxûyan. Hukmat 59 şaredarîyê HDPyî bi rayîrê şîdetê girewtî.”
‘Çareserî azadîya Abdullah Ocalanî ya’
Benedetta di peynîyê qiseyanê xo de wina ard ziwan: “Hêrişê hemverê Kurdan de yê qirkerdiş o. Waştişê AKPyî sey çareserîyî çinî yo. AKP şerêko îdeolojîk ca ano. Bi her kesê azadî û aştî wazenê dir şer wazeno. Demêke verî Fînlandîya û Swêdî waştî bibê endamê NATOyî la ê dewletan ra ame waştiş ke aktivîstê Kurdî bêrê teslîmkerdiş. 2016î ra heta nika 10 hezarî zêdeyêrî endamî û îdarekarê HDPyî tepişteyê. Rayîrê çareserî azadîya Abdullah Ocalanî ya. Ganî sîstemê demokratîkê neweyî bêrê pawitiş û paştdayîş bêro dayîş.” STENBOL
