5 rojnamegerên ku 7 roj berê dema ku çalakiyên li dijî tayînkirina qeyûman dişopandin û hatibûn binçavkirin, piştî îfadeyê hatin berdan
Wezareta karên hundir di 19’ê tebaxê de qeyûm tayînî Şaredariya Bajarê Mezin a Mêrdînê kir. Li ser vê yekê jî gel daket qadan û çalakî li dar xistin. Di dema çalakiyan de polîsan nûçegihanên Ajansa Mezopotamyayê (MA) Ahmet Kanbal û Mehmet Şah Oruç, nûçegihana Jinnews’ê Rojda Aydin û rojnameger Nûrcan Yalçin û Halîme Parlak dema ku çalakî dişopandin di 20’ê tebaxê de binçav kiribûn.
Rojnamegerên ku ev 7 roj in di bin çavan de, îro îfadeya wan hate girtin. Piştî îfadeyê jî rojnamegerên ku li Şaxa TEM’ê ya Midûriyeta Emniyetê ya Mêrdînê dihatin girtin, hatin berdan.
Hat zanîn ku di îfadeyê de pirsa; ‘Di roja çalakiyê de we li wir çi dikir?’ ji rojnamegeran hatiye pirsîn. Rojnamegerên ku îfadeyên wan hatine girtin, piştî kontrola tenduristiyê hatin berdan. MÊRDÎN
