Rojnamegerî Ergun Babahan, Hayko Bagdat û Arzû Demîre ke tewrê forûmê mîyanneteweyîyî yê hemverê DAIŞî bîyî ard ziwan ke forum xeylî pozîtîf ravêrto
Merkezê Cigêrayîşanê Stratejîkan ê Rojawanî mabênê 6-8ê temmuze de hemverê DAIŞî de forûmêko mîyanneteweyî viraştibi. Beşdaranê forûmî ra Ergun Babahan, Hayko Bagdat û Arzû Demîre qalê çimdarîyê xo kerdî.
Babahan: Babeta DAIŞî ganî rojdem de bo
Beşdaranê forûmî ra rojnamekar Ergun Babahanî va: “Rojawanî konferansêkê mîyanneteweyî yê xeylî serkewteyî rê meymandarî kerde. Xeylî cayanê dinya ra, Afrîkaya Başûre ra, Hîndistan, Ewropa û Amerîka ra xeylî ekspertê DAIŞî, huqûqnas, psîkolog, pawitoxê cinîyan û alimî tewrê konferansî bîyî. Mucadeleyê hemverê DAIŞî de Ewropa zî dej ant, labelê înanê ke bedelo tewr giran da Kurdî û bi taybetî zî Êzidîyî bîyî. Cinîyî sey koleyan ameyî rotene, bi mîlyonan merdimî ca û wareyê xo ra bîyî. Na yewe ra ganî babeta DAIŞî tim rojdem de bêro verdayene, seba ke reyna sereyê xo nêdaro we ganî bêro astengkerdene. Na babete de îdareyê Rojawanî xeylî qerardar o. Bi Yewîya Ewropa û Neteweyê Yewbîyayeyî dir mîyanê têkilîye de yo.”
Hayko Bagdat: YPGyijan Tirkîya zî tede dinya belayêk ra xelesna
Beşdaranê konferansî ra Hayko Bagdatî derheqê YPGyî de çimdarîyê xo ard zîwan û va: “Ez ameya Rojawan. Mi tîya DAIŞijê esîrî dîyî. Pîya bi hemmeslekanê xo ma çend DAIŞijan dir qisey kerd. Bitehluke bi ke merdim merdimanê ke bîyê sebebê a barbarîye bivîno. Min înan ra yewî dir pêvînayîş kerd. Çîyo ke bala mi ante ters û qesawetê ‘tirêm înan ra yeno ke reyna wina bikerê’ bi.”
Bagdatî ard ziwan ke çîyo ke ê dî û yo ke verê nikayî televîzyon de dîyo yewbînan ra xeylî cîya bî û vat, tewr zaf YPGyijan ê ser o tesîr kerdo.
Bagdatî va: “Merdiman tîya bi qehremanîyêka pîle seba ke çeteyanê tewr xiraban asteng bikerê canê xo feda kerd. Bi taybetî zî gama ke ez şîya şehîdgeyê Kobanê nê çîyî mi ser o zaf tesîr kerd.”
Bagdatî ard ziwan ke ê şîyê serdana hêzanê xopawitişî û va: “Tabûrê Suryanîyan estê. Tabûrê Ermenîyan estê. Tarbûranê Ermenîyan mi ser o xeylî tesîr kerd. Seba ke Ermenîyan dimayê qirkerdişî ra gama yewine qey pawitişê heqanê xo, qey ke hemverê xirabî de şer bikerê çekî girewtî.”
Beşdaran ra rojnamekare Arzû Demîre zî ard ziwan, vatişê ‘ganî çeteyî Vakur û Rojakewtena Sûrîye de bêrê muhakemekerdene’ yo ke encamnameyê konferansî de ame bewlîkerdene vatişêko xeylî muhîm o. Demîre va: “Babetêka bîne zî a ya ke tayê herêman de hewna zî bingeyê DAIŞî esto. Cayanê ke wextêko derg tede serdest bîyî xo rê bingeyêk aferna. Îdareyo Demokratîk o Xoser ê Rojawan û Vakur û Rojakewtena Sûrîye jehrkiştoxê zihnîyetê DAIŞî yo, loma ganî bêro xurtkerdene.” SILEMANÎ
