Rojnameyê Xwebûnî ke bi kurdî weşan keno bi wesîleya 21ê Sibate Roja Ziwanê Dayîke ya Dinya do şewa paştîdayîşî biviraştêne. La bado ke bobelatê erdlerzî qewimîya rojname dîyar kerd ke ‘roje roja paştîdayîşî ya’ û da zanayîş ke ê do kişta mexduran de bibî û coka ra şewa paştîdayîşî betal kenî.
Xwebûnî ameyoxê bilêtan ke seba şewa paştîdayîşî arê dabî, semedê mexdûranê erdlerzî xerc kerd. Rojname Maseya Krizî ya HDPyî û dezgehanê komelê sîvîlî ra îhtîyacan û konê ke girewtî berdî bajarekê Bilamî yê qezaya Celikanî ya Semsûrî. Rojnamegeran pîya bi mexdûranê erdlerzî konan nayî ro.
Rojnameger Kedrî Eseno ke şî herême da zanayîş ke înan edlerzî vera konserê xo betal kerd û ameyoxê ke înan arê dayî seba mexduran xerc kerdî û vat: “Yew hewte verê cû zî ez ameya herême. Xeylê awanîyî rijîyayî. Şar hema zî konan de nêameyo cakerdiş. Seba ke AFAD kon nêdayo Ebuzerî tewrê keyeyê xo verê heywananê xo de axur de maneno.”
Hemwelatîyê dewe rojnamegeran rê spasîyanê xo kerd û dayî zanayîş ke hema zî înan hetê AFADî ra hetkarîyêk nêgirewtî û bi îmkananê xo dewe de cuyenî. Hemwelatîyan ard ziwan ke AFAD ame la bi zuran ame tu hetkarîya ma nêkerd û reaksîyon nîşan dayî.
