Vizêr Qamişlo de vera hêrişanê kîmyewîyan ê dewleta tirke de çalakîyêke ameye kerdene. Bi hezaran kesî Stadê Şehîdên 12’ê Adarê de kom bîyî. Çalakîkeran çalakîye ra dima ANFyî rê qisey kerd.
Hedîya Ramo Mûsa vat: “Dewleta tirke pêro huqûqê dinya binpay kerd û vera gerîlayan çekê kîmyewîyî şuxilna. Ewro sebebê kombîyayîşê ma paştdayîşê gerîlayan o. Ma bi pêro çîyê xo hetê Rayberîye û gerîlayan de yê.”
Suleyman Eloyî vat: “Dewleta tirke warê sîyasî, dîplomasî û leşkerî de bin kewte coka çekanê kîmyewîyan şuxilnena. Tirkîya Efrîn, Girê Sipî û Serêkanîyê de zî wina sûcê şerî kerdbî. Sûcê dewleta tirke ameyî îsbatkerdene. La dewletê mîyanneteweyî û NY bêveng ê. Ma ewro na bêvengîye protesto kerde.”
Dayîşa şehîdî Henîfe vat: “Gerîlayî doman, way, bira û keyeyê ma yê. Erdogan nînan ra çi wazeno? Erdogan se keno wa bikero ma do hetê domananê xo de bibê.”
Hunermend Sîpan Xelatî vat: “Hêrişê dewleta tirke binkewtişê ci mojnenê. Gerîlayî seba kurdan û pêro şaran koyan de têkoşîn kenê. Şarê kurdî do wayîrê gerîlayan vejîyo. Ganî dinya hînî nê xoverdayîşî bivîna.”
Bahozê serêkanîyêyîjî vat: “Ma sey ciwananê Rojawanî do vera hêrişanê serê gerîlayan xo ver bidê. Dinya şahida ci ya ke dewleta tirke çekanê kîmyewîyan şuxilnena la vengê xo ci rê nêkena. Ganî vera nê tewirî ma têbigêrê.” QAMIŞLO
