Endamê Konseya Rayberdişî ya KCKyî Sabrî Okî bado ke vejîya werte ke CPTyî Rayberê Şarê Kurdî Abdullah Ocalanî dir pêvînayîş nêkerdo, eşkerayîyêke daye. Okî vat: “Heta ke Rayberîye ra xebere bêro girewtene, ganî şarê ma waran de bo.”
Sabrî Okî vist vîrî ke 21 aşmî yo Rayberê Şarê Kurdî Abdullah Ocalanî ra xebere nîna girewene û vat: “Avûkatê Rayber Apoyî zî bi aşman o nêeşkenê ey ra xebere bigêrê. Dewleta tirke tim û tim binê nameyê ‘cezaya dîsîplînî’ de ceza dana Rayberîye û destûrê pêvînayîşî nêdana. Wina qeyde tecrîd dahîna yeno xorîkerdene. Heme dinya zana ke Rayber Apo Rayberê şarê kurdî yo û afernayoxanê Modernîteya Demokratîke yo. Pardîgmaya ey sere de cinî heme komel û merdimîye ser o tesîr kena. Seserra 21.de Rayber Apo wina yew wezîfe û beprisîyarîye geno xo ser û wezîfeyê xo her hetî ra ano ca. Hêzanê ke komployê mîyanneteweyî de ca girewt û dewleta tirke hêzê Rayber Apoyî ra tersenê. Coka heme qanûnan binpay kenê û vera Rayberîye her qeyde zext kenê.
Yeno vatene ke CPT di rey şîyo Îrmali la Rayber Apoyî CPT dir pêvînayîş nêkerdo. Ma heqedarê ke şikdar û hêrsbîyaye nêzdîyê na mesele bibê. Ma nêzanê çi qewimîyayo la ma nê zanê ke werte de rewşêka zaf giran est a. Halêko îstîsnayî est o. Na rewşe ma û şarê ma ra yena nimitene. Coka ganî şarê ma bizano ke rewşêka girane est a. Rejîmê AKP-MHPyî û hêzê mîyanneteweyîyî zaf hole zanê ke Rayber Apo semedê şarê Kurdî yeno çi mana. Rayber Apo estbîyayîşê ma yo, tarîx û cuya ma yo, her çîyê ma yo. Sere de na raştîye bêro zanayene. Ganî ne embazê ma, ne şarê kurdî û ne zî dostê kurdan babeta Îmraliyî de rehet bê. Ma zanê ke dewleta tirke û hêzê komplokerî nêwazenê raştîya şarê ma dir pare bikerê.Na rewşe de berpirîsyara xeylêk dezgeh û şexsan est a. CPT berpirsîyar o ganî cade wezîfeyê xo bîyaro ca. Konseya Ewropa zî ganî rolê xo bîyaro ca û verê na rewşa tehlukeyine bîgêro. Amerîka û heme hêzê mîyanneteweyîyî berpirsîyarê na rewşe yê. Şarê Kurdî û PKK nê zaf hole zan.
Heta çareserkerdişê na mesele bêşik do şar, têgêrayîş û dostê ma payra bê. Rayber Apo ganî cade bibo azad. Xora huqûq semedê kurdan nîno caardene. Rewşa Rayberîye pê têkoşîn û serhildanan bena safî. Ganî her rayîr bêro ceribnayene û bi ruhê seferberîye şiro na babete ser. Babete Rayber Apo yo. Şarê ma ganî heta ke Rayberîye ra xebere bîgêro tim waran de bo. Hedefê ma bêşik azadîya fîzîkîye ya Rayber Apoyî ya. Sîcîlê tewleta tirke xirabin o. Dewleta tirke metodanê bêehleqan şuxulnena û bi serran ra dima beno eşkera. Vera gerîlayan zî çekanê kîmyewîyan şuxulnena. Dişmen her qeyde hêrişê kurdan keno. Ma do rayîrê Rayber Apoyî de bi hewyêkê qerardarî têkoşîn bikerê. Ganî cade avûkatî Rayber Apoyî bîvînê. Eke têkoşîno xurt bêro kerdene keye û avûkatî eşkenê pêvînayîş bikerê. Nê astengkerdişî pê têkoşînî werte ra wedarîyenê. Eke dewleta tirke pêvînayîşanê Rayber Apoyî qedexe bikero, sûc kena. Rewşa winayêne de heqê ma zî est o ke ma goreyê nê cevab bidê.”
