Endamê Konseya Rayberdişî ya KCKyî Sabrî Okî bernameyê taybetî yê Stêrk TVyî de rojdem ercna.
Qiseykerdişê Okî ra tay noqtayê girîngî wina yê:
”Dewlete pê tecrîdê Îmraliyî kena ke têkilîya şarê kurdî bi Rayber Apoyî bibirna. Ma nêzanenê ke Îmrali de se beno la ma zanenê ke Rayber Apoyî binê şertanê xiraban û tecrîdî de tepişîyeno.Ma eşnawit ke çend rojî verî dewleta tirke reyna cezaya dîsîplînî daya Rayber Apoyî. Seba ke Rayber Apo xo ver dano dewlete ey ‘ceza’ kena. Ganî ma sey şarê kurdî, dostanê kurdan, şorişgêr, demokrat û partîye tim rewşa ey teqîb bikerê û erkanê xo bîyarê ca; têkoşîn pîl bikerê. Ganî ma bikerê ke Rayber Apo azad bibo.
Weçînayîşê gulane zaf krîtîk bîyî. Dewleta tirke weçînayîşan de seba Erdoganî xebitîyaye. Çunke dewlete Erdogan o.Vakurê Kurdîstanî de zî îqtîdarê AKP-MHPyî seba ke ser bikewo pêro îmkanê xo seferber kerdî, propagandaya xo de PKK û Rayber Apo zî şuxilnayî. La nê weçînayîşî meşrû nêbîyî. Çunke AKP-Erdogan bin kewtî, bi hezaran koçberanê sûrîyeyîjan raye daye, rayê HDPyî nêhûmarîyayî. Goreyê anketan HDPyî se ra 11-12, MHPyî zî se ra 7 rayî bigirewtêne. La eqsê ce bi. Rayê HDPyî dîyayê MHPyî. Axir AKP reyna bi îqtîdar. La kurdan rixmê pêro hêrişan zî sereyê xo nêard war, tewirê xo nêvurna û îradeyê xo weçînayîşan de mojna. Kurdan rixmê tehlukeyê kişîyayîş û tepişîyayîşî zî îradeyê xo mojna û kerd ker Erdogan Kurdîstan de bin bikewo.
HDP prosesê wçeînayîşan de raştê xeylêk hêrişan ame. Xora bi hezaran sîyasetmedarê ci zî tepişte yê. La reyna zî Partîya Çep a Keske mîqtarê rayan ê holî girewtî. HDP nika weçînayîşan ser o nîqaşan keno, no normal o. La ganî çew netîceyê weçînayîşî sey binkewtişêkî nêercno.Ganî Partîya Çep a Keske xeletî û kêmasîyanê xo ser o vindera, xo hîna hol amade bikera û rêxistin bikera. Rayê ke Partîya Çep a Keske-HDPyî girewtê, rûmetên ê. Oyo girîng no yo ke ganî dersêka raşte bêra girewtene.
Dewleta tirke ya faşîste wazena seserra 2. ya komare de heman hişmendîya xo serdest bikera. Coka AKP-MHP-HUDAPAR îqtîdar de yo. HUDA-PAR vera îradeyê kurdan yanî PKKyî ronîyabi û bi heman armancî ewro mîyanê Îtîfaqê Cumhurî de cadîyayo ci. Şarê kurdî xora rîyê înan ê raştikênî zaneno. Dewleta tirke dewrê neweyî yê îqtîdarê AKP-MHPyî de hêriş û tedayanê vera kurdan û hêzanê demokrasî rê do dewam bikerê.
Îtîfaqê Kede û Azadîye îtîfaqêko rûmetên o la ganî peyê hesabanê qijan de nêşoro. Ganî hêverî meseleya kurdan bêra çareserkerdene. Ameyoxê şaranê Tirkîya û azadîya kurdan mîyanê nê îtîfaqî e yê. 8 mengan ra dima weçînayîşê herêmî est ê. Ganî îtîfaqê Kede û Azadîye xo seba nê weçînayîşan hol amade bikero, rêxistin bikero.
Şaranê Mexmûr û Şingalî heta nika bedelê giranî dayî. Dewleta tirke nînan ra qesasê DAIŞî gêno. Şarê Mexmûrî verê DAIŞî girewt. Heta o çax Mesûd Barzanîyî bi xo gerîlayî uca de fîraz kerdî. Dewleta tirke Iraqî rê teda kena ke wa Mexmûrî veng bikera. Ganî Iraq meseleyanê xo yan zî waştişanê xo bi dîyalogan şarê Mexmûrî de çareser bikero. Şingal de zî dewleta tirke her roje hêrişê cayêkî kena. PDKyo ke wextê hêrişanê DAIŞî de remabi nika vano ‘ez wayîrê Şingalî ya.’ Dewleta tirke bi bahaneya ‘PKK Şingal de yo’ hêriş kena la na zûr a. Şingal de qet yew hêzê ma çin o. Ganî hukmatê Iraqî vera nê hêrişanê dewleta tirke tewir bigêro. Ganî pêro kurdî hetê şaranê Mexmûr û Şingalî de cabigêrê û paştî bidê înan.” BEHDÎNAN
