Namzeda Şaredarîya Yenîşehîrî ya DEM Partî Safîye Akdag derheqê armancan û plananê serê şaredarîye de ANFyî rê qisey kerd.
Akdage da zanayene ke sey cinîyêke a tradîsyonê HEP, DEP û HADEPî teqîb kena û bingeyê paradîgmaya demokratîke, ekolojîke û azadîya cinîyan de têkoşîn kena. Safîye vat: ”Ma sey cinîyan raştê zaf tedayan yenê, bedelanê giranan danê la apey gamêke zî nêerzenê. Helbet seba qedînayîşê texrîbatanê qeyûman wext lazim o. Ma do pêro înîsîyatîfan bigêrê xo ser û xizmetê şarê xo bikerê.”
Safîye Akdag îfade kerd ke ê wazenê projeyanê xo yê serê cinî, ciwan û domanan bivisnê dewre û vera şerê taybetî têkoşîn bikerê. Akdage vat: ”Ma armanc kenê ke cinîyan çalakîyanê xoza de bêrê têhet, perwerdeyê zîretê xozayîy bidê cinîyan û festîvalanê mehsulanê cinîyan bikerê. Ma do şaredarîye de seba cinî û ciwanan merkezan abikerê. Ma do vera polîtîkayanê şerê taybetî yê sey vilakerdişê madeyanê tîryakîyan paştî bidê tedawîya ciwanan. Ma do seba cinî û ciwanan kursanê ziwan, muzîk, tîyatro ûsn. abikerê.”
Safîye ard ziwan ke vera tecrîdê serê Rayberê Şarê Kurdî Abdullah Ocalanî zî ê do tim sey her wextî têkoşîn bikerê û bi qerardarî tecrîdî bişiknê. Safîye vat: ”Ma do rayîr nêdê ke qeyûmî ancî îradeyê şarê ma xesp bikerê. Ma do şarê xo reyde şaredarîyan îdare bikerê.” AMED
