Hêrişanê dewleta tirke ya îşxalkere yê vera Rojawanî ra dima têgêrayîşê DAIŞî Rojhelatê Mîyanênî û herême de zêdîyayî. Hemserekê PYDyî Salîh Muslimî derheqê têkilîya dewleta tirke ya bi DAIŞî de ANFyî rê qisey kerd.
Salîh Muslîmî îfade kerd ke dewlete DAIŞî sey hacetêkî seba menfaetanê xo şuxilnena û vat: ”Dewleta tirke seba çinkerdişê kurdan tim DAIŞ şuxilna. Coka DAIŞî verê xo da Kurdîstanî. Xora Rojawan de peynîya serwerîya DAIŞî ameye ardene la îdeolojîya DAIŞî çin nêbîya. Wexto ke dewleta tirke hewce vînena DAIŞî visnena dewre. Hema wextê rêxistinîya DAIŞî de Tirkîya merdimê xo kerdî mîyanê DAIŞî. Ebu Muslîm tirkmen bi. DAIŞî Mûsil de bînaya serseferîye ya Tirkîya sey qerargehî şuxilnabî. Dewleta tirke vana ke a vera DAIŞî têkoşîn kena la çîyo winayên çin o. Dewleta tirke hema zî Rojawan de DAIŞî şuxilnena. Hêrişanê DAIŞî yê vera Xiwêranî de têkilîya DAIŞ-Tirkîya bi belgeyan ameye îsbatkerdene. Heta ke dewleta tirke paştî bida DAIŞî tehlukeyê DAIŞî do nêqedo.”
Salîh Muslîmî da zanayene ke cerganê DAIŞî yê ke hêrişê Rojawanî kerdo ê zafêr Tacîkistan, Kazakistan, Efganistanî ra yê û vat: “No çi mojneno ke Tirkîya derheqê Asyaya Mîyanêne de zî wayîra planan a û wazena pêro herême têmîyan bikera. Tirkîya Asyaya Mîyanêne de zî paştî dana DAIŞî. Eke cayêke de DAIŞ est bo tede huzir do çin bo. DAIŞ merdiman kişeno û şerê zereyî xorin keno. Estbîyayîşê DAIŞî seba pêro Asyaya Mîyanêne û Rojhelatê Mîyanênî tehluke yo. Ma tim Koalîsyonê Mîyanneteweyî rê vanê ke ganî verê destekê seba DAIŞî bêro girewtene. Koalîsyono Mîyanneteweyî zî bi xo zaneno ke Tirkîya paştî dana DAIŞî la vera Tirkîya çew tênêgêreno.
Welatê Ewropa, Rûsya û Amerîka bi xo vanê ke Tirkîya paştî dana DAIŞî. La rixmê ney zî bêveng ê. Çunke nê zî goreyê menfaetanê xo têgêrenê. Tirkîya DAIŞî vera kurdan herême de şuxilnena. Mîsal Vakur de zî Huda Parî vera kurdan şuxilnena ke Huda Par zî sey DAIŞî yo. Başûr de zî Tirkîya DAIŞî vera kurdan şuxilnena. Yanî mabênê DAIŞ û Tirkîya de têkilîyêka organîke est a. Coka bêvengîya vera têkilîyanê DAIŞî û Tirkîya yena manaya bi adirî kaykerdişî. Dîyar nîyo ke no adir do kamca bivişno. Ganî Tirkîya rê sînorêk ronîyo. Bi destê DAIŞî vera kurdan qirkerdişî yenê kerdene. La DAIŞ teyna seba kurdan ney seba pêro herême tehluke yo. Ma hêvî kenê ke her kes kayanê Tirkîya bivîno û verê nê kayan bigêro.” HESEKÊ
