Serekê Komeleya Kultur û Ziwanê Kurdan û ziwannas Samî Tanî teda û qedexeyê vera kurdkî ANFyî rê ernayî.
Samî Tanî ard ziwan ke qedexeyê vera kurdkî hetê mezgê yewperestî û zorbazî ra seba afernayîşê netewe-dewlete yenê caardene û vat: ”No mezg bi rayîrê dezgehanê perwerdeyî, bi rayîrê çapemenîye mîyanê komelî de ameyo vilakerdene ganî bêro vurnayene. Seba ney zî têkoşîn lazim o.”
Tanî pare kerd ke seba ke şarê kurdî xoverdayox o kurdkî yena krîmînalîzekerdene. Tanî bale ante ser ke xoverdayîşê kurdan girîng o la qîm nêkeno û ganî babeta ziwanî de têkoşînêko plankerde û zanaye bêro kerdene.
Samî Tanî vat: ”Mîyanê partîyanê kurdan de zî derheqê ziwanê kurdkî de plansazî û polîtîkayê cidîyî çin ê. Goreyê cigêrayîşan mîyanê doman û ciwanan de qiseykerdişê bi kurdkî zaf kêm o. Eke ziwanêk hetê domanan ra nêro qiseykerdene hinî ameyoxê ci çin beno.”
Tanî îfade kerd ke babete de qasê sîyasetmedar û roşnvîran erk keweno milê keyeyan zî û vat: ”Ganî her kes keye de bi kurdkî qisey bikero. Vera mezgê yewperestî ganî têkoşînêko hempar bêro kerdene. Eke ziwanêk mîyanê neslan de bêro vilakerdene hînî polîtîkayê asîmîlasyonî eşkenê werte ra bêrê wedaritene. Polîtîkayê asîmîlasyonî pratîk de eşkenê bêrê çinkerdene. Êyê ke na babete de serkêşîye bikerê waro sivîl û sîyaseto rêxistinkerde yo.”
