Vizêr Kadikoyê Stenbolî de çalakîya ke vera tecrîdê Îmraliyî û binpaykerdişê heqanê tepişteyan ameye kerdene de polîsan hêrişê şarî kerd û polîsêk lapete daye Hemserekê HDPyî yê Stenbolî Ferhat Encuyî ro. Ewro verê banê HDPyî yê Kadikoyî de bi tewrbîyayîş Hemserekanê Pêroyî yê HDPyî Pervîne Buldan û Mîthat Sancarî hêrişê polîsan ame protestokerdene.
Polîsan pê wesayîtanê zirxitanan dormeyê banê qeza girewt û pê gazê îsotî hêrişê şarî ked. Dayîkê ke nobeta edaletî tepişene û xelêk kesê bînî pê şîdetî ameyî destbendkerdene. Şarî pê slogana “AKP do hesab bido şarî” cewabê hêrişan da.
Nê hêrişî ramojnenê ke îqtîdar senî terseno
Hemserekê Pêroyî yê HDPyî Mîthat Sancarî verê ablûqa de vera astenkerdişê polîsan hêrsê xo ard ziwna û vat: “Nê hêrişî ramojnenê ke îqtîdar senî terseno. Têkoşînê demokrasîyî ra tersenê. La ma do çirey nê têkoşînî cameverdê. Ma do sandiq de cewabê tewr zelalî bidê înan. Ma do verê edaletî de hesabê nê bêhuqûqîyan bipersê. Wa şikê çewî çînêbo, ablûqayî nêeşkenê ma birijnê. Lapata ke vizêr ameye eştene do sandiq de sey cewabê girdî nê îqtîdarî rê peyser agêro.”
Do hesabê lapata ke ameye eştene bêro persayene
Reyna Dêrsim, Colemêrg, Êlih, Agirî, Adana, Mersin, Hatay û xeylêk bajranê bînan ê Kurdistan û Tirkîya de vera tecrîd, zextanê serê tepişteyan û hêrişê polîsan ê vizêrî çalakîyê protestoyî ameyî kerdene û ame vatene ke lapata ke ameye eştene do hesabê ci bêro persayene. STENBOL
