Endamên CHP’ê yên Komîsyona Mafê Hikumxwar û Girtiyan a Jêr ku di bin banê Komîsyona Lêkolîna Mafê Mirovan a Meclisê de dixebitin çûn serdana hevşaredarê Qersê Ayhan Bîlgen ê di çarçoveya ‘Lêpirsîna Kobanê’ de hat girtin. Endamên Komîsyonê yên CHP’yî Parlamentera Îzmîrê Sevda Erdan Kiliç û parlamenterê Enqereyê Alî Haydar Hakverdî di şandeyê de cih girtin. Şandeyê li Girtîgeha Sîncanê ya Tîpa F a Enqereyê serdana Bîlgen kir û têkildarî serdanê daxuyaniyek nivîskî belav kir. Di daxuyaniyê de hat gotin ku Bîlgen bi moral û silametî bûye û ew li hucreya yek kesî tê ragirtin û hat diyarkirin ku her cûre operasyon û êrîşên li dijî muxalefetê tengavî û xitimandina îktîdarê ya li her qadê dide nîşandan. ENQERE
