Şarê saetanê serê sibayî ra qezayanê cîya cîyayan ra seba şermizarkerdişê tecrîdkerdişê Rayberê PKKyî Abdullah Ocalanî û piştîdayîşê çalakîya zindanan herikîyeno Stenbol û Raşteyê Azadîye yê Bakirkoyî ra derbazê raşteyê mîtîngî beno.
Rêxistinê Partîya Demokratîke ya Şaran (HDP) ya Stenbolî seba bale antişê grevê vîşanîye, şermizarkerdişê tecrîdkerdişê Rayberê PKKyî Abdullah Ocalanî û piştîdayîşê çalakîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke 88 rojî yo grevê vêşanîye de ya, mîtîng organîze kerde. Şar Raşteyê Azadîye yê Bakirkoyî de arê beno û Hemserekê HDPyî Pervîn Buldan û Sezaî Temellî zî mîtîng de hadre yî. HDP bi siloganê ‘Ma seba Ked, Aştî û Edalet resenî yewbînan’ mîtîng pê ano. Raşteyê mîtîngî de hemverê tecrîdê Îmrali de vengê ‘Tecrîd do tarîtî bidirno! Do meşaleya azadîye gur bibo! Şarê xoverdekar şono Şoriş û do ser bikewo!’ ber beno.
Rayîrê E-5 ke şono raşteyê mîtîng û kuçeyê Încîrlî hetê polîsan ra ameyî padayîş. Tarafîk zî şîyayîş û ameyîş rê ameyo padayîş. Serê her kuçeyêk de TOMA û wesayîtê zirxî ameyî bicakerdiş, labelê reyna zî şar herikîyeno raşteyê mîtîngî û siloganan berz keno. Hemwelatîyê ke şonê mîtîng 3 nuktayan de yenî sehnayîş û cigêrayîş. Hemwelatîyî hemverê heme astengîyan de bi siloganan derbazê raşteyê mîtîngî benî. HDP bi wesayîtan verê awanîyê qezayanê xo ra şar beno raşteyê mîtîng. Herikîyayîşê mîtîngî bi hawayo kêfweş dewam keno. Kesê ke yenî raşteyê mîtîngî xoverdayîşê zindanan silam kenî. Raşteyê mîtîngî de posterê gird yê ‘Leyla Guvene heqdar a, do tesilî tecrîd bêro şiknayîş’ ame daliqnayîş. STENBOL
