Şarê Hatayî 20 sibate de reyna lerzîya. rîyê erdlerzî ra awanîyê ke xesar girewtbî pêro rijîyayî û ceyran zî bi temamî şî. Şarê bajarî tersanê erdlerzî ra ver nê zimistanî de teber ra mend. Awanîyê ke erdlerzê Mereşî yê 6ê sibate de xesar girewtbî, nê erdlerzê peyên ê Hatayî de rijîyayî. Şar tersan ver xo eşt teber û hewl da ke çadirêk peyda bikero. 75 çadirî bi hetkarîya Suîdî Erabistanî ameyê la nufûsê ucayî 30 hezar o. Coka qet qîm nêkerd û kaosêk vejîya. Şar yew wezîfedarêk zî nêdî û no hersê înan zî kerd di qatî.
Şarê Hatayî Ajansê Xeberan yê Firatî (ANF) rê qisey kerd û dîyar kerd ke wazenê çadirêka înan est biba û xo tede bisetarnê.
‘Nê rojan de seke ma cehenemî de yê’
Keyayê taxa Ekîncî, Can Tekîn Uçarî dîyar kerd ke şarê herême bi rojan o ke hewl dano xo rê çadirêk peyda bikero û vat: “Nê rojan de seke ma cehenemî de yê. Taxa Ekîncî berdêlêko giran da. Se ra 70ê awanîyan rijîyayî. Tay qanalê xeberan ke tîya de weşan kenê, nîşan danê ke seke tîya de her çî zaf asan o.”
‘16 rojî yo ke çadir, awe û ceyran çin ê’
Ûçarî dîyar kerd ke problemê tewr gird ê taxe çadir ê û vat: “16 rojî vîyartî, la hema zî çadirî çin ê, hema awe û ceyran çin o. Gedeyî, kokimî, ciwanî her kes zereyê erebayan de yo. Bi metodanê verênan xo rê naylonan rê setargehêk virazenê. Çadirî xeylê kêmî yê û qîm nêkenê.”
‘Ma de hêz nêmend ke ma xover bidê’
Şarêkê taxe zî vat: “Stresî ra êdî ma nêeşkenê îdare bikerê. Mîyanê nê xirban de ma 11 kesî binê çadirêkî de manenê. Hetkarîya çadirî nêyena kerdene.”
Kesêkê bînî zî vat: “Ma merdê, ma her çîyî xo vindî kerdî, hetkarîya ma bikerê.”
‘Afadî vat, ‘Wa Homa hetkarîya şima bikero’
Taxe ra kesêkî: “Ma hewl da ke tîmanê AFADî bidê vindarnayene, la ma ra vajîya ke, ‘Wa Homa hetkarîya şima bikero’. Maya mi kokim a, nêeşkena rayîr şêra la bê çare ya ke ê şertan de ciwîyena. Ma mîyanê bêçaretîye de verdayî. Cayo ke ma şêrê çin o.”
‘Seba ke keye de malzemeyê ma est ê ma nêeşkîyayê tîya ra şêrê’
Alî Şahûtogullari ke vernîya keyeyê xo yê rijîayeyî de vinderte yo, bi hewldayîşêkî xo rê çadirêk peyda kerd û tede maneno. Şahûtogullari ard ziwan ke pîyê ey zî Nêweşxaneyê Antakya de binê xirbe de mendo û vat: “Nika ma 20 kesî binê na çadira şenike de manenê. Ne dewlete, ne şaredare ne zî cayêkê bînî ra hetkarîyêk nêame. Keyeyê ma rijîyayîşî ver de yo. Seba ke malzemeyê ma nêrê diznayene, ma tîya der ê, vernîya înan de nobet gênê. Heywanê ma zî tîya de yê, cayo ke ma şêrê, çin o.” HATAY
