Wekîla Parlamentoyê Katalanî Eulàlia Reguanta ke partîya CUPÎ temsîl kena ard ziwan ke hêrişê dewleta tirke yê vera Rojawanî huqûqê mîyanneteweyîyî binpay kenê û vat şarê katalînî do tim paştî şarê kurdî.
Eulàlia Reguant vat: “Tirîya senî ke Vakur de bi serran o bi hewayêkê sîstematîkî hêrişê şarê kurdî kena, inkey hêrişê Rojawanî kena. Rejîmê Erdoganî inkey herême bombarduman keno û îşxal keno. Komelê mîyanneteweyîyî û bitaybetî Îspanya ke bi Tirkîya tekîlîyanê xo yê leşkerîyan domnena, bi bêvengîya xo benê hemkarê nê hêrişan. Huqûqê mîyanneteweyîyî yeno binpaykerdene. Na rewşêka giran a ke merdim qisawet keno. Gama ke heme çimî açarîyayî Ukrayna nê binpaykerdişê heqan dîyayî destpêkerdene. Katalonya tek parlamentoyo ke Îdareyê Xoserî yê Rojawanî nas keno. Ma binpaykerdişê huqûqê mîyanneteweyîyî yê Erdoganî şermezar kenê. Na rewşe bena sebebê tehtîdanê konsolosxaneyê Tirkîya.”
Eulàlia Reguant wina dewam kerd: “Tekîlîya Erdogan û DAIŞî xora yena zanayene. Erdogan semedê şerkerdişê herême na raştîye ra feyde keno. Na rewşêka zaf giran a û eybêk o pîl o. No mojeno ke Erdogan senî otorîter û despotîk o. Coka ganî komelê mîyanneteweyîyî bêveng memano û tekîlîya xo bi Erdoganî bibirno. Dinya seba ke vera hêrişanê dewleta tirke yê vera Rojawanî bêveng a, xîyanetê ercane demokratîkan kena. Na bêvengîya ercê demokrasîya Ewropa zî ramojnena. Şarê katalanî senî ke Parlamentoyê Katalanî serrêke verî îfade kerd, tim paştî dano têkoşînê kurdan û projeyê konfedarlîzmê demokratîkî û ercanê ci paweno û do tim bipawo.” MADRID
