Artêşa Iraqî wazena Kampa Mexmûrî pê têlan bîgêro binê ablûqa la şarê Mexmûrî vera nê xover dano. Artêşa Iraqî vera şarî tifînî şuxulnayî û şarî zî pê kerrayan cewab da. Naye ser o artêşa Iraqî mecbûr mend ke peyser agêro. Ciwano bi nameyê Ahmed Omerî bi guleyê hêzanê artêşa tirke birîndar bi.
Şarê Mexmûrî semedê astengkerdişê dekewtişê kampe vera artêşa Iraqî xeymî nayî ro û nobete daye destpêkerdene. Roja diyîn a xoverdayîşî de çalakwanan derheqê xoverdayîşê xo de ANFyî rê qisey kerd.
Çalakwanan ra Sadiq Evdalî ard ziwan ke ê têna azadîye wazenê û vat: “Artêşa Iraqî kena ke pê têlan û kuleyan dormeyê kampe bîgêro, ma nê qebul nêkenê û destûr nêdanê. Eke ma nê qebul bikerdêne xora ma welatê xo de qebul kerdêne. Ma heta ewro zilm qebul nêkerd, ma do ewro ra tepîya zî qebul mekerê.”
Çalakwanan ra Meryeme Cindî zî vat: “Ma ablûqa qebul nêkenê. Ma do heta dalpaya peyên a gonîya xo xover bidê. Ma do qetî destûr medê ke ê bikewê kampe.” MEXMÛR
