Hemserekê Şaredarîya Perî, derheqê xebatanê kooperatîfan de citkaran dir kombîyayîş viraşt, kombîyayîşî ra dima pîya bi citkaran erazîya şaredarîye de beşîlayî karitî
Şaredarîya Bajarekî ya Perî ya qezaya Mazgêrdî ya Dêrsimî derheqê xebatanê kooperatîfî de bi sernameyê ‘Ganî ma kooperatîfêkê senênî virazê?’ kombîyayîşêk viraşt. Kombîyayîşo ke salona şaredarîye de ame viraştene, serekê pêroyî yê Konfederasyonê Sendîkayanê Citkaran Abdullah Aysû û hemserekê şaredarîye Songul Dogane, Orhan Çelebî û xeylî citkarî tewrê ci bîyî.
Hemserekê şaredarîye Orhan Çelebîyî ard ziwan ke se ra 90ê şarê bajarekî debara xo bi zîretî keno û vat seba ke şar bieşko çîyê ke resnayê hîna asan biwero ganî kooperatîfî bêrê viraştene. Hemsereke Songul Dogane zî vat ke ganî cinîyî tewrê kooperatîfî bibê û vat cinîyî heywankarîye de û wareyê zîretî de serkêşîye kenê la heqê keda xo nêeşkenê bigêrê.
Abdullah Aysûyo ke dima ra qisey kerd va: “Ma sey şuxulnayoxî zibil nê jehr şuxulnenê. Ma bi zibilê kîmyawîyî hem herre û hem zî ganeyanê ci kişenê. Nê sîstemî mîyan de halkerdişê nê problemî mumkun nêyo. Hukmat seba nê gamêk nêerzeno. Çunke nê de zaf zêde kar bi dest fîneno.”
Dimayê kombîyayîşî ra hemserekan û citkaran erazîya şaredarîye ya ke 30 donimî bîye dendikê vilan û beşîlayî karitî. Hemserekan va: “Karo ke do bikewo dest do hem seba şarê ma hem zî seba şaredarîya ma bêro şuxulnayene.” DÊRSIM
