Hemşaredara Şaredarîya Sûrî ya Amedî Fîlîz Buluttekîne operasyonanê qirkerdişê sîyasîyî de netîceyê sereştişê keyeyê xo de ameye binçimkerdene. Polîsan badê keye eştî awanîya şaredarîye ser zî û Şaredarîya Sûrî nika binê ablûqaya polîsan de ya
Polîsan Amed de ewro saetanê serê sibayî eşt awanîya xizmetî ya Şaredarîya Sûrî ser. Polîsan dormeyê awanîye girewtî û awanî de cigêrayîşê polîsan hema zî dewam keno. Saetanê serê sibayî de polîsan eşt keyeyê Hemşaredara Şaredarîya Sûrî ya Amedî Fîlîz Buluttekîn û endamê Meclîsê Şaredarîye Yilmaz Ekenî ser. Cigêrayîşanê keyeyan ra dima Buluttekîne û Ekenî ameyî girewtene. Polîsan Eren û Buluttekîne berdî Mudirîya Asayîşî ya Amedî. Dekewtiş û vejîyayîşê awanîya şaredarî girîyayo binê kontolê polîsan. Avûkata şaredarîye Gulşen Demîre wexto ke awanîya şaredarîye de cigêrayîşê bombe ameyêne kerdene, pêvînayîş pê arde û seba ke cigêrayîşan de aye zî biba dekewte awanîya şaredarîye. Wexto ke cigêrayîşan dewam kerdêne personelê şaredarîye dekewtî awanî, labelê destûr nêdîya ke endamê meclîsî dekewî awanîye.
Parlementera Partîya Demokratîke ya Şaran (HDP) ya Amedî Remziye Tosune û endamê meclîsî verê awanîye de vindetişê xo domnenî. AMED
