Ame waştene ke serkêşîya Enstîtuya Kurdan ya Stenbolî de Meydanê Kartalî de bi wesîleya 15ê Gulane Roşanê Ziwanê Kurdkî rayraşîyayîşêk bêro kerdene la polîsan rayraşîyayîş asteng kerd. parlementera HDPyî Meral Daniş Beştane û Hemserekê Partîya Demokratîke ya Şaran (HDP) yê Stenbolî Ferhat Encuyî zî paştî daye rayraşîyayîş.
Astengkerdişê polîsan ra dima girseyî çalakîya roniştişî kerde û erbaneyan reyde deyîrê kurdkî vatî.
Aktîvîte de Dayîka Aştîye Fince Akman qisey kerd û îfade kerd ke dinya de kurdkî ra ber ziwanêko bîn qedexe nîyo û ganî hişmendîya ke kurdkî qedexe kena wa bişerma.
Ferhat Encuyî zî pare kerd ke dewleta tirke ya faşîste kurdkî qedexe kena, nameyanê kurdkî vurnena û wazena kurdkî çin bikera. Encuyî vat: “Bedelê ci çi beno wa bibo ma do bi serbestî ziwanê xo qisey bikerê. Heta ke kurdkî biba ziwanê perwerdeyî û ziwano fermî ma do têkoşînê xo rê dewam bikerê.”
Meral Daniş Beştaşe dîyar kerd ke wayîrvejîyayîşê ziwanî wayîrvejîyayîşê xobîyayîşî yo û vat: “Ziwanê ma rûmetê ma yo û ma do heta peynî ziwanê xo bipawê. Nê welatî de kurdan rê dişmenîye yena kerdene. Polîsî nêverdenê ke ma seba ziwanê xo rayraşîyayîşî bikerê.”
Qiseykerdişan ra dima girseyî govende girewte.
