Teşebusê Pawitişê Hesenkeyfî seba vindarnayîşê projeyê Awbendê Ilisû va: “Hema ke nîyo erê, ma pawenê ke fikir û wijdan bikewî dewre.”
Teşebusê Pawitişê Hesenkeyfî derheqê halo peyên ê Awbendê Ilisû û Hesenkeyfî de eşkerayîyêk daye çapemenîye. Eşkerayîya ke bi sernameyê ‘Seba Hesenkeyfî erey mekewe! Awbendê Ilisûyî tavilî vindarnê’ ameye dayene de qalê muhîmîya tarîxî û kulturkî ya Hesenkeyfî ame kerdene.
Teşebusî vat, ê kenê ke Hesenkeyfî fedayê Awbendê Ilisûyî û projeyê Santralê Hîdro Elektrîkî (HES) bikerê, emrê projeyê awbendî 50 serrî yo û ame vatene: “Projeyê Ilisûyî k ever bi qedînayîşî yo, bê vînayîşê peymananê neteweyîyan û mîyanneteweyîyan ameyo amadekerdene. Raporê ci yê Ercnayîşê Tesîrê Dormeyî zî çino.”
Eşkerayîye de bêxemîya UNESCO û Mehkemeya Heqanê Merdiman ya Ewropa zî amî vîrvistene û ame vatene ke her di sazîyî bîyê hemparê sûcê qirkerdişê kulturkîyî. Peynîya eşkerayîye de veng dîya rayapêroyî ya demokratîke ke seba xelesnayîşê Hesenkeyfî û Newala Dîcle bê ke erey bikewê tê bigêrê. ÊLIH
