Roşnvîr û nuştoxo kurd Munzur Çemo ke 11ê kanûne de Berlin de kanserî ra şibi heqîya xo, Cemxaneyê Berlinî yê Almanya de seba ci erkanê oxirkerdişê ver bi Heqî ame kerdene. Erkanê oxirkerdişî de Mîkaîl Aslan û Cemîl Koçgirî lawikî vatî. Xeylêk nuştox û kedkarê kirdkî (kirmanckî) zî tede bi seyan kesî tewrê erkanî bîyî.
Înstîtutê Ziwan û Kulturê Kirmancî yo ke Munzur Çem zî ronayoxanê ci ra yew bi û Berlin de xebatê kirdkî keno, erkan serûber kerd. Înstîtutî erkanî ra dima hesabanê xo yê medyaya dîjîtale de no mesaj vila kerd û derheqê erkanî de detayî dayî:
“To rê oxir bo, keko Munzur!
Se ke êno zanitene roşnvîr, kurdperwer, tarîxnas, açernayox, sîyasetmedar, awankerdox û endamê ma, endame Înstîtutê Ziwan û Kulturê kirmancî Munzur Çem çi heyf ke roja 11.12. 2022 de şîbî heqîya xo. Ewro (14.12.2022) kî Cemxaneyê Berlin de merasîmê serweşîye û kekê Munzur Çem ra xatir waştene bîye.
Merasîmê serweşîye û xatir waştene saete 14:00 de bi gulbangê Pîr Mahmut Yildizî dest pêkerd. Dest pêkerdena merasîm de xêyle nas û dostanê êy, mordemanê êy, rayhevalan êy kî, oncîya bi nameyê komelan, bi nameyê dêzgehan û bi nameyê partîyan xêyle kesan cayê xo guret û kekê Munzur ra xatirê xo waşt.
Merasîmê serweşîye Cemxaneyê de dewam kerd û bi nameyê Înstîtutê Ziwan û Kulturê kirmancî mamoste Lerzan Jandîl û Îbrahîmê Xaşxaşe qesey kerd û bi rêze xanima kek Munzurî Gulistan xanime û birayê êy, rayhevalanê êy, nas û dostanê êy hîsê xo û vatenê xo ard ra ziwan.
Peynîya merasîmê serweşîye û xatir waştene de Musa Gönüli yew şîware vate û dima hunermendê hêcayî Soner Soyer, Şener Yildiz, Sevgî Yurtsever, Cemîl Qocgîrî, Mikaîl Aslan, Pinar û Îmam Özgülî pîya bi yew lawuke kek Munzur kerd rayê û roja poncşemîye kî kekê Munzurî benê hardo dewrêş Kirmancîya Beleke de danê we.
Kekê ma yo heca, ma endamê înstîtutî to re zaf sipasdar îme. Ma şarê kirmancîye (kurdî) eseranê to yê nasnameyî, ziwan, tarix, kulturî ra tim îstîfade bikerîme. Ala ke to ra gureta hard de nêverdanîme, xebate înstîtutî, ziwan û kulturê ma, dewa welatî berdewam kenîme. Çimê to peyde nêmanê. Tim mîyanê roştîye de bimane.
To rê oxir bo, keko Munzur! Ma to xo vîr ra nêkenîme!”
Munzur Çem 16ê kanûne de teqrîben saete 11.00 de dewa Seterî ya Xorxolî ya Çewlîgî de do bêro definkerdene. BERLIN
