Newroza emserrî do seba paştdayîşê hemwelatijanê herêma erdlerzî bi sloganê ‘Her ca Newroze her dem azadî’ virazîya. Xebata seba Newroze her ca de dewam kena. Stebol de zî xebate ver bi peynîbîyayîşî de ya. Endama Komîteya Tertîpî ya Newroza Stenbolî û endama Meclîsa HDPyî Aylîn Hacaloglu Newroza Stenbolî ra ver ke do 19ê Adare de Raşteyê Yenîkapi pê bêra de qisey kerd.
Hacalogluye da zanayene ke bi hêrs, şîn û rijnayîşo ke erdlerzî de virazîya Newroze pêşwazî bikerê û wina vat: “Newroza 2023yî eynî wext de mîlad a. Newroze sembola xoverdayîşî ya. Ma nê prosesî sey prosesê girdkerdişê xoverdayîşî yê şaran vînenê. Raşteyê Newroze û tewbîyayîşê şarî yê Newroze do bibo fotografê îradeyî. Şar do hesabê nê prosesî biperso û cuya newe awan bikero.”
Seba tutan qelema boyaxî…
Aylîne dîyar kerd ke amadekarîyê Newroze dewam kenê û xebatêke cîya pê anê û wina dewam kerd: “Ma pêro qezayan de broşurî vila kerd. Ma kombîyayîş pê ard. Ma zîyaretê keyeyan û bazaran kerd. Qezayan de xebata Newroze bê maben dewam kena. Seba tutanê herêma erdlerzî qaleme, defter, qelemê boyaxî û kitabî yenê arêdayîş. Şar emserr bi hêrsê xo yeno raşteyanê Newroze. Do hemverê tecrîdê serê Abdullah Ocalanî de veng bêro berzkerdiş.”
Ma xoverdayîşî gird bikerê
Hacalogluye qiseykerdişê xo yê peyênan de vengê tewrbîyayîşê Newroze kerd û vat: “Newroze berzkerdişê umud, xoverdayîş û têkoşînî ya. Ma dejê şarê xo yê herêma erdlerzî pare kenê. Ma heme kesî 19ê Adare de dawetê Raşteyê Yenîkapiyî kenê.” STENBOL
