Torra Ziwanî û Kulturê Kurdkî û Platformê Ziwanê Kurdkî seba minasebetê 15ê Gulane Roşanê Ziwanê Kurdkî di 8ê Gulane de startê xo dayî. Torra Ziwanî û Kulturê Kurdkî û Platformê Ziwanê Kurdkî xebatê panelî, teqdîmkerdişê tiyatroyî, şahîyî û xebatê tutan ardî ca. Di çerçewayê nê xebatan de zî, 15ê Gulane de rayîrşîyayîşêk girseyî yeno organîzekerdiş. Rayîrşîyayîş di seete 16:00î de cikerdişê Bayramoglû ra dest pê keno heya Parqa Koşûyolîyî peynî beno. Cinîyê ke beşdarê xebatan benê seba rayîrşîyayîş bêro organîzekerdiş veng kerdî û vatî bêrê ma seba Ziwanê Kurdkî bibê yew.
Endame ya Enstîtuya Kurdkî ya Amedî Mîne Karakaş, sere de bale ante serê xebatê Roşanê Ziwanê Kurdkî ke bi rojano dewam keno û wina vat: “Ewro Roja Roşanê Ziwanê Kurdkî yo. Di çerçewaya na roje de ma xeylêk komeleyî tê dir xebatî kerdî û çalakî organîze kerdî. Seke şima zî vînenê coş û eleqeyêke pîl hetê qican û pîlan ra yeno ramojnayîş. No coşo bîyaye zî ma rê beno moral. Ma bawer ê ke do bi nê coşî netîceyê başî bêrê bidestfînayîş. Yeno zanayene ke do 15ê Gulane de zî, di çerçewayê xebatê Roşanê Ziwanê Kudkî de rayîrşîyayîşêk girseyî bêro organîzekerdiş. Ma seba nê rayîrşîyayîşî zî venga heme şarê xo kenê ke beşdarê nê rayîrşîyayîşî bibê. Seba pawitişê Ziwanê Kurdkî her kesêke vengêko pîl o. Ganî ma bi na hêsgirîyî beşdar bibê.”
‘Bêrê ma bibê yew’
Hunermenda Ma Muzîkî Herêm Nergîze seba nê vatişan veng kerd: “Sere ra Roşanê Ziwanî ro şima heminan pîroz kena. Ma umîd kenê ke Ziwanê Kurdkî bibo ziwanê perwerdeyî. Vera ke ziwan rûmetê merdimî yo. Ziwan seba ma eşq o. Ganî ma pê deyîran, kilamê deyîrvatişan, hîkayeyan vajê. Bi xusûsî zî ganî her wext ma ganî verdê û raver berê. Ma seke hunermendî, ma di qismê xo de hewl danê. Ganî her kes goreyê wezîfeyê xo û quwetê xo di mîyanê hewldanî de bo. Tewr peynî zî ez wazena vaja ganî şarê ma hetkarîyêke pîl bido ziwanî û xebatê seba ziwanî yenê kerdiş. Nê çerçewayî de zî ma do 15ê Gulane de seba ziwanî rayîrşîyayîş û 16ê menge de zî ma fînalê xebate danê. Ma do seke deyîrvatoxî û muzîkjenê Ma Muzîkî konser bidê. Ma pabeyê şarî yê. Bi umîdê beşdarbîyayîşêke girseyî. Seba ziwan û bîyayîşê ma bêro, ma têreyde bibê yew. Eke ziwan çinî bibo, bîyayîşê ma zî nêmaneno. Ganî ma bi Kurdkî qisey bikerê, bi Kurdkî biciwîyê û bi Kurdkî bimûsê!”
‘Seba Ziwanê Kurkî bêrê ma têreyde rayîr şêrê’
Mamosteya MED-DERî Dîlan Guvenç, bi nê vatişan venga rayîrşîyayîşo ke do 15ê Gulane de bêro kerdiş, kerd: “Ma zî seke komeleya MED-DERî Roja Ziwanê Kurdkî ro şima heminan pîroz kenê. Seke şima zî zanenê ziwan asasê netewî yo. Seba minasebetê pîrozkerdişê ziwanî û baleantişê serê polîtîkayê asîmîlasyonî de, ma rêzeçalakî organîze kerdî. Çalakîyê seke panel, şahî û xebatê tutan ardî ca. Çalakîya ma qandê hewteyêke dewam kerd. Çalakîyê ma bi coş û girseyî ameyî pîrozkerdiş. Ma di nê umîdî de yê ke heya fînalî zî ma bi tewirêke girseyî xebatê xo bidê kerdiş. 15ê menge de zî rayîrşîyayîşêk ma yo girseyî esto. Bêrê ma têreyde waştişê xo yê ‘Wa Ziwanê Kurdkî bibo ziwanê perwerdeyî’ bikerê. Seba Ziwanê Kurdkî, bêrê ma têreyde rayîr şêrê.” AMED
