Dewleta tirk a dagirker êrîşên xwe li dijî herêmên bakur û rojhilatê Sûriyeyê didomîne. Rojane herêmê topbaran dike. Di encama êrişên wê di vê dawiyê de, gelek zarok şehîd bûn. Her wiha beriya çend rojan êriş kantona Minbicê kiribû û di encamê de leşkerên hikûmeta Şamê hatibûn kuştin û birîndar bûbûn.
Şêniyên bajarê Şedadê ev êrîş şermezar kirin. Şêniyê bi navê Mihemed El Xilêf got: “Hedefgirtina binesaziya bajêr, kuştina sivîlan û koçberkirina şêniyan, sûc e. Armanca dewleta tirk ji êrîşan, dagirkirina herêmê û guhertina demografiyê ye.” El Xilêf bêdengiya civata navneteweyî li hember êrîşan şermezar kir.
Elî El Elî jî ji bajarokê Til El Şayir e destnîşan kir ku armanca dewleta tirk ji êrişan, têkbirina ewlehiya herêmê ye û got: “Dewleta Tirk xeyal dike serfiraziyên osmaniyan vegerîne, herêmê dagir bike. Ji ber wê DAIŞ’ê bi kar tîne da ku vê xewnê bi dest bixin. Em amade ne ku herêmê biparêzin. Em bi Hêzên Sûriya Demokratîk (HSD) re ne.”
Yasir El Bikir ê ji bajarokê Til Şayir êrîşên dewleta tirk a dagirker şermezar kir û wiha anî ziman: “Dewleta tirk bi van êrîşan tevahî qanûn û pîvanên navneteweyî binpê dike. Serokê dewleta tirk hewl dide projeya Rêveberiya Xweser tune bike, ji ber ku bi saya vê projeyê herêm ewle ye û aştî lê serwer e. Ew jî li hember vê rewşê ne rihet e.”
