Meclisa Malbatên Şehîdan li Şehîdgeha Rustem Cûdî ya li gundê Berkevirê yê Dêrikê, ji bo bîranîna Rustem Cûdî (Rustem Osman) û şehîdên têkoşîna azadiyê merasîmek li dar xist.
Hevserokê PYD’ê Enwer Muslim, endamê Meclisa Giştî ya PYD`ê Ebdulkerîm Saroxan, hevserokê Desteya Parastinê ya Herêma Firatê Îsmet Şêx Hesen û nûnerên partiyên siyasî û şêniyên Dirbêsiyê tev li merasîmê bûn.
Di merasîmê de Enwer Muslim axivî û diyar kir ku ev neh sal e Rustem Cûdî şehîd bûyer lê hê jî di nav wan de dijî.
Muslim da zanîn ku piştî Şoreşa 19’ê Tîrmehê û pêkanîna projeya neteweya demokratîk di navbera pêkhateyên bakur û rojhilatê Sûriyeyê de, ragihandina Rêveberiya Xweser, tiştekî asayî bû ku hêzên dijber di serî de AKP êrîşî herêmê bike û gelên wê bike hedef û wiha got: “Çeteyên ku dewleta tirk ji bo têkbirina projeya neteweya demokratîk bi kar anîne, Cebhet El-Nusra, DAIŞ û Artêşa Nîştimanî ya Sûriyeyê hemû li hemberî vîn û hêza pêkhateyên herêmê bi bin ketin.”
Di axaftina xwe de Muslim behsa şerê taybet ê ku dewleta tirk li herêmê dimeşîne, kir û ev tişt anî ziman: “Li hemberî vî şerê taybet divê em asta têkoşîn û berxwedanê bilind bikin. Armanca me rizgarkirina tevahiya axa dagirkirî ji dewleta tirk a dagirker e, mîna Efrîn, Serêkaniyê û Girê Spî û hemû herêmên dagirkirine.”
Muslim di dawiya axaftina xwe de şehîd Rustem Cûdî û tevahiya şehîdên azadiyê bi bîr anîn û soza şopandina rêya wan heta pêkanîna civakeke demokratîk û azad da.
Paşê li ser navê malbata şehîd Rustem Cûdî birayê wî Xelîl Osman axivî û bixêrhatina beşdarên merasîmê kir û wiha got: “Em bejna xwe li hemberî giyanê şehîdan ditewînin. Şehîd Rustem Cûdî ji bo azadiya gelê xwe û ji bo bi rûmet bijî canê xwe feda kir.”
Merasîm bi berzkirina dirûşmên dilsoziya bi şehîdan re bi dawî bû. DÊRIK
