Hesekê de semedê cinîya kurda şorişgêre Zelal Zagrose (Firyal Xalid) ya ke Kerkûk de netîceya suîkastî de şehîde bîye, Şehîdgehê Şehîd Dijwarî merasîmê cenaza ame kerdene.
Kantonê Cizîre ra temsîlkarê Îdareyê Xoserîya Demokratîke, rayberê eşîran û rêxistina cinîyan ra bi seyan kesî tewrê merasîmê Zelal Zagrose bîyî. Meclîsê Keyeyanê Şehîdan ra heta Şehîdgehê Şehîd Dijwarî yê dewa Dawûdiye ya Hesekê bi konvoyî ame şîyayêne.
Fatme Aliya ke merasîm de bi nameyê Meclîsê Keyeyanê Şehîdan qisey kerd, vat, ”Şehîde Zelal bi îxanetî ameyî kiştene. Ma soz danê ke ma do rayîrê aye teqîp bikerê û qesasê ci bîgêrê.”
Endama Kongra Starî Laleşîne Hesekê zî bale ante ser ke Şehîde Zelal pawitoxê heqanê cinîyan bî û vat: “Şehîde Zelal her cayê Kurdîstanî de têkoşîn kerd. Vera destkewteyanê şorişî her hetî ra tehdîtî est ê. Ganî ma şorişê xo bipawê.”
Minewere Xalida ke bi nameyê keyeyê şehîde qisey kerd, vist vîrî ke Şehîde Zelal emrê xo semedê têkoşînî dayo û vat: “Aye pawitişê destkewteyanê şorişê Rojawanî ma rê sey mîrasî verda. Tim vatêne ganî ma zafêr têkoşîn bikero. Ma do têkoşînê aye bidê domnayene.”
Reyna qiseykerdoxanê bînan zî veng da dezgehanê huqûqî yê mîyanneteweyî ke wa semedê vînayîşê kiştoxan û hesabpersayîşî zext bikerê.
Dima re belgeyê şehadetî yê Şehîd Zelale dîya keyeyê ci û cenazaya ci bi sloganan ameye definkerdene. HESEKÊ
