Bi hezaran şêniyên bajarê Kobanê, endamên saziyên sivîl û leşkerî, partiyên siyasî yên herêma Firatê û şêniyên ji tevahiya Bakur û Rojhilatê Sûriyeyê bi merasîmeke girseyî cenazeyên şehîd Nûjiyan Ocalan, Viyan Kobanê û Rojîn Ehmed Îsa li goristana Şehîd Dîcle ya Kobanê spartin axê. Her wiha Welat Yelmaz ê ku berî demekê dema erka xwe bi cih dianî şehîd bûbû, hat bibîranîn.
Endamên Tevgera Ciwanên Şoreşger û Yekitiya Jinên Ciwan; Nûjiyan Ocalan, Viyan Kobanê, Rojîn Ehmed Îsa, Merhef Xelîl Îbrahîm û Welîd Mihemed Menle di êrîşa balafireke bêmirov a dewleta tirk a dagirker de li bajarê Kobanê şehîd bûbûn. Cenazeyên Merhef Xelîl Îbrahîm û Welîd Mihemed Menle duh êvarî li navçeya Eyn Îsayê hatin veşartin.
Endamê Koordînasyona Tevgera Ciwanên Şoreşger ên Sûriyeyê Tolhildan Zerdeşt axivî û got ku dewleta tirk hedefgirtina sivîl ji xwe re kiriye kar û sedema vê yekê bêdengiya navneteweyî ye û diyar kir ku ew xwe naspêrin tu kesî, belê li dijî van êrîşan ew ê xwe bispêrin ciwanên xwe.
Cîgirê hevserokatiya Meclisa Kantona Girê Spî ya dagikirî Sebrî Nibo axivî û ev tişt anî ziman: “Dewleta tirk a dagirker hewldana qirkirina gelê herêmê dike û bi rêya qirkirina bedenî û şerê derûnî şerê qirkirinê pêk tîne. Lê gelek tiştan paşguh dike wekî ku Rêber Abdullah Ocalan dibêje, me ciwanan dest pê kir û em ê bi ciwanan bi ser bikevin.”
Hevserokê Meclisa Malbatên Şehîdan a Herêma Firatê Eyşê Efendî jî ev tişt vegot: “Li hemberî van êrîşên li dijî me, em ê bêdeng nemînin. Em serî ji tu kesî re natewînin û di şoreşa xwe ya ku me dest pê kiriye û em ê biserbikevin de, em li nîvê rê ne. Em xwediyên karwanê şehîdan e ku ji me re rêya azadiyê bi ruhê xwe xêz kirine û em ê şopdarên rêya wan in.”
Piştî axaftin bi dawî bûn, Meclisa Malbatên Şehîdan nasnameya şehîdan xwend û radestî malbatên wan kirin.
Piştre cenazeyên şehîd Nûjiyan Ocalan, Viyan Kobanê û Rojîn Ehmed Îsa bi dirûşmeyên dilsoziya bi şehîdan re hatin veşartin. KOBANÊ
