Sekreterê Giştî yê Partiya Demokratîk a Pêşverû ya Kurd li Sûriyeyê Abdulhemîd Hac Derwêş îro di danê sibehê de rehmet kir
Partiya Demokratîk a Pêşverû ya Kurd a li Sûriyeyê (PDK-S) îro bi daxuyaniyekê ragihand ku sekreterê giştî yê partiya wan têkoşer Abdulhemîd Derwêş îro saet di 02:00’an a serê sibehê de rehmet kiriye.
Komîteya Navendî ya PDK-S’ê bi bîr xist ku Hac Derwîş dê sibe li gundê wî Qurmanî yê girêdayî Dirbêsiyeyê saet di 10:00’an de bê veşartin. Dê karwana oxirkirinê ji pêş Stada 12’ê Adarê ya Qamişloyê bi rê bikeve. Komîteyê diyar kir ku dê merasîma sersaxiyê li bajarê Qamişloyê ji îro de 3 rojan bê lidarxistin.
Sekreterê Giştî yê PDK-S’ê Abdulhemîd Hac Derwêş (1930) ji gundê Qurmanî yê girêdayî navçeya Dirbêsiyê ya kantona Hesekê ya Herêma Cizîrê ye. Hac Derwêş yek ji damezirînerên tevgera siyasî ya kurd a li Sûriyeyê ye. Gelek erkên girîng di partî û rêxistinên siyasî de hilgirt. Herî dawî jî weke Sekreterê Giştî yê Partiya Demokratîk a Pêşverû ya Kurd li Sûriyeyê hatibû hilbijartin.
