Rayberê PKKyî Abdullah Ocalan 24 serrî yo binê tecrîdî de yeno tepiştiş û 20 aşmî yo Rayberê PKKyî Abdullah Ocalan û tepişteyanê bînî yê Omer Hayrî Konar, Veysî Aktaş û Hamîlî Yildirimî ra xebere nîna girewtiş. Muracatê keye û avûkatan hetê wezîrîya edalet û serdozgerîya komerî ya Bursa ra yenê redkerdiş. Seba ke pêvînayîş nînê kerdiş û xeberêke nîna girewtiş muracatê avûkatan yê Tirkîya û dinya resa bi hezaran. 22 welatan ra 350 avûkatî muracatê wezîrîya edaletî ya Tirkîya kerd.
Kombîyayîşo ke Belçîka de ame kerdiş de ame vatiş ke seba pêvînayîşî muracat kerdê. Avûkat Selma Benkhelîfa ke Belçîka de cuyena û îmze eşte mektuba muracatî derheqê CPTyî, tecrîdo girankerde de qisey kerd.
CPT hemverê bêhuqûqîye de bêveng o
Benkhelîfa da zanayîş ke astengîyê ke seba pêvînayîşê Abdullah Ocalanî yenê vetiş pêro polîtîk ê û ganî CPT bikewo mîyanê têgêrayîş. Selmaye wina vat: “Hetê qanûnî ra mecburê ke rayîr bidê pêvînayîşan. Bi serran verê cû, serra 2014î de seba ke pêvînayîşê bi Ocalanî reyde ame redkerdiş Mehkemaya Heqanê Merdiman ya Ewropa Tirkîya mehkum kerd. Ê wextan Ocalan Îmrali de tena bî. Dima ra tay tepişteyî şawîyayî uca. La nika ma vînenê ke Erdogan hemverê Ocalanî de şîdetêko gird pê ano. No qerar tebere qanûnî yo. CPT ganî bi lez rapor hadre bikero. Ganî Mehkemaya Heqanê Merdiman bikewa mîyanê têgêrayîşî.”
‘Ma avûkatê Ocalanî yê’
Benkhelîfa dewamê qiseykerdişê xo de wina vat: “Maktuba ke 350 avûkatî şawitî wezîrîya edaletî ya Tirkîya, tena waştişnameyêke nîya. Na mektubêke raşt a. Ewropa ra 300 avûkatî û pêroyê cîhanî ra 700 parlementerî bi muracatanê xo vatî ke ma avûkatê Ocalanî yê û ma wazenê dewa bêra akerdiş. La hema cewabêke nêameyo dayîş. Ganî ma sere de seba welatê xo bikewî mîyanê têgêrayîşî. Mi îmze eşte mektube. Ez Belçîka de avûkatî kena. Çi bêro vatiş û çi bibo zî ganî ez baroyê xo û wezîrîya edaletî reyde bikewa têkilî. Ganî ez vaja ‘Tirkîya de muvekîlê mi esto la destur nîno dayîş ke ez xo biresna ci’.”
‘Acaba CPT çi nimneno’
Benkhelîfa dîyar kerd ke derheqê weşîya Ocalanî de wayîrê xebere nîyê û hemleya înan ya bîn de do CPT reyde têkilî bironê û wina dewam kerd: “Tecrîd îşkence yo. Rayîrê vernîgirewtişê îşkenceyî ra yew zî pêvînayîşê avûkatan o. Ma rewşa Ocalanî nêzanê. Çimkî ma ê nêvînenê. Nêeşkeno avûkatanê xo reyde pêvînayîş bikero. Na rewşe şeklê dîktatorîye gêna. Tecrubeyê verê cû yê CPTyî ra, yeno zanayîş ke CPTyî tay çîyan nimneno. Vanê ‘biewnêne ma xebetîyenê’ la tay çîyan nimnenê. Eke ma şêrê CPTyî ma do vajê ‘Gelo şima çi nimnenî?’. Gelo şima Tirkîya reyde serê çi de bazarî kerd? Ma bi şikin ê. Ganî ma bi hawayêke qanûnî her çîyî bizanê.”
‘Ocalan seba kurdan umud o’
Selmaye da zanayîş ke ê nêzanê Ocalan cuyeno ya nê û wina dewam kerd: “Mi gore cuyeno. Çimkî ê nêeşkenê çîyêke winasî binimnî. La reyna zî ma derheqê ci de şikin î. No zirar tena nêdîyeno Ocalanî eynî wextî de dîyeno tabanê ci rê. Erdogan hemverê kurdan de şer keno. Bi hêrişanê hemverê Rojawan, Şingal û Efrînî baş asîyeno. Ocalan umudê kurdan o. Wazenê kurdan bê umud biverdî. Seba ke Tirkîya endama NATOyî ya ganî her waştişê aye nêrî caardiş. Ganî ma her ca de veng bidî dewletan ke bikewî têgêrayîş mîyan. Ganî ma dewletan bidî zor. Cîhan hemverê caardişê serê Ukrayna de xeylê bi hêrs o. La Tirkîya hêrişê Srîye kena û kes veng nêkeno. Nê çîyê ke yenê kerdiş seyyewbînan î. La wexto ke babete bena kurd, bêvengî manenê.”
‘Ganî ma xo biresnî Ocalanî’
Selmaye qiseykerdişê xo yê peyênan de îdia kerd ke Erdogan do weçînayîş ra ver destur bido ke Ocalanî reyde pêvînayîş bêro kerdiş û wina qedêna: “Biewnêne kesêk binê tecrîdî de îşkence kenî la dima ra destur danî. No pêvînayîş pêvînayîşêke azad nîyo. No azadîya fikr û hîssan nîyo. Ma avûkat û keyeyî ganî bi ahwayêke azad pêvînayîl pê bîyarî. Ez wina vana. Ocalan umudê kurdan o. Kurdî seba ma umud î. Ocalan û Cinîyê kurdî seba ma umud î. Way û birayê ma yê Kobanê û Şingalî umud danî ma.” ANQARA
