Taxa Hasirli ya qezaya Sûrî ya Amedî de wextê xoverdayîşê xoîdarekerdişî yê 2015-2016î de şerêko giran mabenê dewtele û ciwananê kurdan yê xoverdayoxan de virazîyabî. Badê qedîyayîşê şerî ra nata 5 serrî yo ke taxe de kinitiş dewam keno. Xebatkarêko ke nêwaşt nameyê xo eşkera bikero pare kerdbî ke mabênê Dêrê Katolîkî û Mescîdê Hasirliyî de 5ê sibate de ‘cenazayêka ke pê kincê sipîyî pêşîyaya ameye dîyene. Yeno texmînkerdene ke cenazeya ke qezaya Sûrî ya Amedî de ame dîyayene aîdê Hakan Arslanî ke şer de şehîd bibî, ba. Keyeyê Arslanî muracatê Serdozgerîya Komarî ya Amedî kerd.
Cenazeya ke wextê xebatanê kinitişî de mabenê Dêrê Katolîkî û Mescîdê Hasirliyî de ame dîyayene wedarîya morgê Dezgeyê Tibê Edlî (ATK).
Goreyê xeberanê ke keyeyê Hakan Arslanî da Arslan cuya xo vindî kerdo û kişta Camîyê Hasirliyî de ameyo definkerdene. Keyeyê Arslanî 5 serrî yo gêreno cenazaya lajê xo. Keye bi desan reyan amebi Amed, muracatê selahîyetdaran kerd. La muracatê înan nêameyî qebulkerdene.
Pîyê Hakan Arslanî, Alî Riza Arslano ke îhtîmal keno ke cenazeya ke ame dîyayene ê lajê ci ya, bi rayirê avukatê xo bi waştişnameyêko nuştekî muracatê Serdozgerîya Komarî ya Amedî kerd. Serdozgerî pîyê Arslanî rê vat ke semedê tespîtkerdişê kamî lazim nîyo ke reyna testê DNA bido, ê serra 2016î hema derbazdar o.
Alî Riza Arslano ke muracatê Buroyê Amedî yê Komeleya Heqê Merdiman (ÎHD) kerd û dazanayene ke ê paweyê netîceyê testê DNAyî. AMED
