Baglarê Amed de semedê gerîlaya YJA Starî Hatice Ay (Adare Amed) ya ke ke 19ê êlule Pîranê Amedî de hêrişê dewleta tirke de şehîde bîye, mewlud ame dayene. Îdarakerê Komeleya Paştdayîşê Keyeyanê ke Domanê xo Vînî kerdî (MEBYA-DER), Meclîsê Dayîkanê Haştîye, endamê HDP û, DBP û xeylêk kesî tewrê mewlîdî bîyî.
Meryeme Soyluya ke mewlud de bi nameyê MEBYA-DERî qisey kerd bale ante hêrişanê qirkerdişî yê vera kurdan ser ke bi serran o yenê domnayene. Soylu vat: “Pê polîtîkayanê qirkerdişî kenê ke nasname û tarîxê kurdan çîn bikerê. Ciwananê kurdan ke na rewşe qebul nêkerd vera nê polîtîkayan semeêd cuyeyêka azade ganê xo feda kenê. Ganî heme dayîkî wayîrê têkoşînê azadîye bivejîyê. Azadîye û haştîye do yê ma bê.” AMED
