Parlamentera HDPyî Semra Guzele bale ante serê bêkontrolîya dibistanan û vat ke sedema jehrkewtişê wendekaranê dibistanê Çewlîgî peygoşîye û bêtedbîrîye ra yo
Parlamentera Partîya Demokratîke ya Şaran (HDP) ya Amedî Semra Guzele bale ante qewimîyayîşê jehrkewtişê domanan ê Çewlîgî ser û vat derehqê babete de cipersayîşêk nêameyo destpêkerdene, eşkerayo ke dewlete wazena serê ci biqefilno.
Wendekarê dibistane û dibistana mîyanêne ya Xoşkarî ya Çewlîgî, dejê sereye û zereyî, viritiş, sûrbîyayîşê rîyî, şewat û kênayîşê çime û destan ra şîyê Nêweşxaneyê Nêweşî yê Cinîye û Domanan a Çewlîgî. Domanan dibistane de madeya cîwa dîye û dima ke pê kay kerde, nêweş kewtî. Tedawîya 47 wendekaran û 5 mamostayan û xebatkarêkê dibistane hema zî dewam kena. Yeno vatene ke cîwa 100 wendekaran rê tesîr kerd. Domananê ke pê jehrî kewtî ra 7 kesî Nêweşxaneyê Dewlete yê Xarpêtî de beşê lezkanî de yê. Wendekaran rê kemoterapî ameyî kerdene û tehlukeyê cuya yê înan dewam keno. Keyeyanê nê domanan bale ante serê peygoşîye, labelê nika tedawîkerdişê domanan ra ber nêeşkenê çîyêko bîn de eleqadar bê û biqesawet ê ke meseleyo mende yê weşîye bêro meydan.
‘Bêkontrolîye, pêgoşîye û bêtedbîrîye’
Parlamentera HDPyî Semra Guzele derheqê babeta de qisey kerd û vîst vîrî ke kontolê ke ganîyî yê bi hewayêkê binizamî hetê Wezaretê Weşîye ra biameyêne kerdene, nêameyî kerdene û va: “Nê serebûtî rîyê peygoşîye û bêtedbîrîye ra ameyî meydan. Madeyêka winasêna reyde kontrolê mamostayan ra ber ganî domanî nêeşkê îmtîhanan de bixebitnê û ganî a mintiqa bêra kontrolkerdene. Derheqê babete de cipersayîşêk nêameyo destpêkerdene û kesêk zî nêameyo destbendkerdene. Polîtîkaya dewlete ya cezanêdayîşê sucdaran heme cayan de vila bîya. Rewşêka winayêne de ganî selahîyetdarî reya verêne derheqê serebûtî de îzehetêk bidê, labelê nika xîret kenê babete binimnê. Dima ke babete rojnameyan de ameye weşanene Walîtîye dimayê çar-panc rojan derheqê babete de qisey kerd. Eke wina nêbîyêne, tewr qisey nêkerdêne. Şima kamî xapînenê? Êyê ke pê jehrî kewtî domanê ma yê. Şima neçar ê ke îzehetêk bide.” ÇEWLÎG
