Merkezê Xeberan
Sendîkayanê pîlêran ê Îngilîstanî ra UNITE û GMB Newhamî çarçewa Kampanyaya ‘Ocalanî rê Azadîye’ îlanêk da rojnameyê Newham Recorderî. Sendîkayanê Unite the Union (UNITE), GMB, USDAW, CWU, FBU, NEU, Meclîsê Şarê Kurdî û ‘Freedom for Ocalan Campaign’ morê xo da binê nê îlanî. Îlan bi serrnameyê ‘Ocalanî rê Azadîye, Rojhelatê Mîyanênî û Tirkîya rê Haştîye’ vejîya.
Îlan de bi kilmî wina yeno vatene: ”Kurdan DAIŞî çin kerd, Rojawan de cuyêka newîye awan kerde. Dewleta tirke û cergê ci zî hêrişê kurdan kenê û xîret kenê ke kurdan qir bikerê. 2013-2015 de prosesê haştîye hetê Abdullah Ocalanî ra ame îdarekerdene û hetê Erdoganî ra ame çinkerdene.Wextê ci ameyo ke prosesêko newe dest pêbikero. Wext ameyo ke tecrîdê vera merdimîye û tepiştetîya 20 serre ya Abdullah Ocalanî biqedê. Seba ke berê zîndanî abibê ganî çarçewa Kampanyaya ‘Ocalanî rê Azadîye’ de lîderê polîtîkî, komelo sivîl û rayaumûmîya mîyanneteweyî têbigêrê. ”
Îlan de nê çîyî ameyî waştene:
-Tecrîd û îzolasyonê vera Abdullah Ocalanî wa biqedê.
-Lîderê kurdan o tepişte Abdullah Ocalan wa cade bêro veradayene. Polîtîkaya teda û zulmî ya vera muxalefetî qa biqeda.
-Tepişteyê sîyasî wa vera bidîyê.
-Operasyonê vera Rojawanî û Başûrê Kurdîstanî biqedê. Paştî bêra dayene prosesêkê neweyî.
