Navenda Nûçeyan |
Piştî ku Partiya Demokrat a Kurdistanê (PDK) hêzên pêşmerge yên girêdayî xwe şandin herêma Zînî Wertê, di navbera PKK, YNK û PDK’ê de alozî derket. Ji ber aloziya heyî raya giştî ya gelê kurd jî nerazîbûn nîşan dan û hema hema ji her derdorê ve banga hevgirtin, yekitî û çareserkirina mesilhetê bi rêyên diyalogê hatin kirin. Têkildarî mijarê welatiyên Helebçe û Kelarê jî ji Rojnewsê re axivîn.
Ji welatiyên Helebçeyê Celal Ebdulstar got ku metirsiya dubarebûna şerê birakujiyê heye û diyar kir ku ji bo şerê birakujiyê çênebe jî divê di zûtirîn dem de PDK û YNK hêzên xwe ji Zînî Wertê vekişînin. Ebdulstar bilêv kir ku dewletên derve zextê li partiyên Başûr dikin û gelek caran bi gotinên van hêzan dikin. Ebdulsetar da zanîn ku ev yek jî ziyanê digihîne yekrêzî û yekitiya gelê kurd.
Bang li PDK û YNK’ê kirin
Welatiyê bi navê Rizgar Heme Nûrî jî da zanîn ku aloziya li Zînî Wertê plana dewleta tirk e û dewleta tirk dixwaze bi hinceta PKK’ê artêşa xwe têxe nava xaka Başûr. Ji şêniyên Helebçeyê Mihemed Heme Reza jî rewşa heyî wiha vedibêje: “Bûyera li Zînî Wertê ne bûyera dawî ye ku di nava partiyên kurd de rû dide. Her carê li cihekî cuda heman tişt rû dide. Daxwaza min a ji PDK û YNK’ê ew e ku hêza xwe paşve bikişînin.”
‘Armanc êrîşa li dijî Qendîlê ye’
Têkildarî mijarê ji şêniyên Kelar a Germiyanê Eyad Mihemed jî bi lêv kir ku ya ku li Zînî Wertê pêk tê, destpêka plana dewleta tirk a ji bo êrîşa li ser Qendîlê ye. Mihemed dibêje ku armanca dewleta tirk êrîşa li ser Qendîlê û avakirina baregehên nû ye û vê jî bi destê hêzen başûrê Kurdistanê dike. Bi domdarî jî Mihemed ev nirxandin kir: “Ger rê li ber vê planê neyê girtin, dewleta tirk dê planên nû bixe meriyetê. Ez bang li her kesî dikim ku bêdeng nemînin û pêşî li ber şerekî navxweyî bigirin.”
Ji kelariyan Ednan Salih jî têkildarî mijarê wiha got: “Ev alozî hewldana dewleta tirk e. Armanca wê jî ew e ku di navbera kurdan de şerê navxweyî derxînin. Berpirsyarên vê rewşê YNK û PDK ne. Divê xelk êdî rê nede van her du hêzan ku ewqas binpêkirinan bikin.”
