Navenda Nûçeyan |
Şêniyên navçeya Çelebiyê ya girêdayî kantona Kobanê û bajarokê Girbawî yê kantona Qamişloyê ji bo destekdayîna gerîlayên azadiya Kurdistanê û şermezarkirina êrîşên dewleta tirk a dagirker daketin qadan.
Bi sedan şêniyên navçeya Çelebiyê ya Kobanê û gundên wê û karmendên saziyên sivîl ên navçeyê tev li meşê bûn. Meşê ji têketina başûrê navçeyê dest pê kir û ber bi gundê Xirab Işikê ve dewam kir.
Şêniyan di meşê de berxwedana gerîlayan silav kir û êrîşên dewleta tirk a dagirker şermezar kirin.
Meş li qada giştî ya gundê Xirab Işikê veguherî mîtîngê. Hevseroka navçeyê Xedîce Faris axivî û êrîşên dewleta tirk ên li dijî Herêmên Parastinê yên Medyayê şermezar kirin û berxwedan gerîla ya li Herêmên Parastinê yên Medyayê û berxwedan HSD’ê ya li hemberî dagirkeriya tirk silav kir.
Her wiha Faris bêdengiya navneteweyî ya li dijî êrîşên dewleta tirk jî şermezar kir.
Mîtîng bi berzkirina sloganên silavkirina berxwedana gerîla, bi dawî bû.
Li bajarokê Girbawî şênî li dijî dagirkeriyê meşiyan
Şêniyên bajarokê Girbawî yê kantona Qamişloyê jî bi heman armancî meşiyan
Meş ji çerxerêya El-Firin dest pê kir û li ber avahiya şaredariya bajarokê veguherî mîtîngê. Di mitîngê de endama Rêveber a Kongreya Star Fedye Îsmaîl axivî û êrîşên dewleta tirk a dagirker ên li dijî Herêmên Parastinê yên Medyayê û bêdengiya navneteweyî ya li hemberî wan êrîşan şermezar kirin û wiha got: “Dewleta tirk ne tenê dijminatiye gelê kurd dike dijminatiya hemû gelên herêmê dike. Gelê herêmê piştgiriya hêzên li çiyayên Kurdistanê dike, dê her tim wefadarê wan bin û şopdarên rêya şehîdan bin.”
Mîtîng bi berzkirina sloganên silavkirina berxwedana gerîla û şermezarkirina êrîşên dewleta tirk a dagirker bi dawî bû.
