Bakur û Rojhilatê Sûriyeyê bi xwereveberiya xweser û xweparastina cewherî ji cîhanê re bûye mînak. Pergala Neteweya Demokratîk bi qasî ji gelên bindest re bûye hêviya jiyaneke azad, tirseke mezin xistiye dilê dagirkeran. Dewleta tirk a dagirker bi vê tirsê bênavber êrişî herêmê dike. Lê şêniyên herêmê diyar dikin ku ev êrîş, vîna wan a berdewamkirina berxwedanê naşikîne. Şêniyên bajarê Til Temirê yê kantona Cizîrê ku li eniyên şer e, li hember êrişên dewleta tirk a dagirker û çeteyên wê yên rojane li ber xwe didin û der barê armanca êrîşan û helwesta xwe li hember wan êrîşan de axivîn.
Şêniyê bi navê Îmam Elo ev tişt anî ziman: “Dewleta tirk ji van êrişan dixwaze projeya neteweya demokratîk û Rêveberiya Xweser têk bibe, ji ber ku ew bi xwe ji hevgirtina pêkhateyên herêmê yên kurd, ereb, suryan û asûr ditirse.”
Elo wiha domand: “Dewleta tirk tu rêbaz nehişt ji bo ku Rêveberiya Xweser têk bibe, çi bi rêya çeteyên `Artêşa Niştimanî` yan jî bi rêya qutkirina ava stasyona Elok a li Serêkaniyê yê dagirkirî.”
Her wiha Elo diyar kir ku dewleta tirk a dagirker nikare projeya Rêveberiya Xweser tune bike, ji ber ku gelê herêmê xwedî li axa xwe û vê projeyê derketiye.
Şêniya bi navê Hemdiye Mihemed Gotî jî got: “Dewleta tirk li ser terorê ava bûye. Ji destpêka aloziyê ve, gelek rêxistinên terorîst ava kirin û piştgiriya wê kir. Dema Rêveberiya Xweser hate damezirandin jî, piştgirî da DAIŞ`ê û Artêşa Azad, kir. Tenê ji bo ku projeya Rêveberiya Xweser a li herêmê têk bibe.”
Hemdiye destnîşan kir ku bi ragihandina Rêveberiya Xweser re ku dê hilbijartinên şaredariyan li dar bixe, dewleta tirk a dagirker êrişên xwe li dijî herêmê zêde kirin û gef xwar ku dê careke din herêmê dagir bike.
Hemdiye wiha pê de çû: “Em hemû amade ne li hember wan êrişan bisekinin. Em ê herêmê xwe ji Erdogan û hevalbendên wî û her kesê dixwazin destkeftiyên gelê me têk bibin, biparêzin.”
Şêniyê bi navê Hesen Ezîz Şendî jî got: “Dewleta tirk bi êrişan, hewl dide hegemoya xwe li herêmê ferz bike. Lê belê pêkhateyên herêmê li hember tevahî planên wê sekinîn û dê careke din bi hevgirtina xwe li hember wê bisekinin.”
Şendî wiha anî ziman: “Ji 2011`an ve, dewleta tirk xwest bikeve herêmê û wê dagir bike. Lê belê bi ser neket. Ji ber ku şêniyên Til Temirê li ber xwe dan û ev bajar bi pirrengiya xwe, jiyana aştiyane ya di navbera pêkhateyên bajêr de û hevgirtina wan li hember êrîşan, navdar e.”
