Yeno pawitene ke vernîyazê qanûnî yê seba vurnayîşê sîstêmê baroyan hewtena do şêro Meclîs. Serekanê baroyan ê 41 şaristanan 19ê hezîrane de vera vernîyazî dest pê rayraşîyayîşî kerdbi. Çalakîye Anqara de do biqeda.
Serekanê baroyan derheqê çalakîyanê xo de wina vat:
Serekê Baroyê Dêrsimî Kenan Çetîn: ”Êyê ke wazenê baroyan hîş bikerê û teslîm bigêrê wazenê welat de pêro heywan, park, baxçe, hemwelatî hîş bibê. Ma do heta peynî têkoşînê xo dewam bikerê û hûquq bipawê.”
Serekê Baroyê Çewlîgî Hanîfî Budancamanak: ”Pê nê sîstemî û vernîyazî yeno waştene ke serwerîya huqûqî werte ra bêra wedaritene. Eke serwerîya huqûqî zî bêra çinkerdene hînî heqê pêro hemwelatîyan kewenê binê tehlukeyî.”
Serekê Baroyê Amedî Cîhan Aydin: ”Ma armanc kenê ke vernîyaz apey bêro antene. Ma seba pêro hemwelatîyan venga heq, hûq, edalet danê. Çunke eke avûkat û baroyî binê tehlûke de yê , hemwelatîyî zî binê tehlukeyî de yê.”
Serekê Baoyê Mêrdînî Îsmaîl Elîk: ”Tirkîya de tay dezgehî mendî ke serwerîya huqûqî pawenê. Nê dezgehan ra yew zî baro yo. Xîret yeno kerdene ke pê bêvengkerdişê baroyan tekperestîye tam bêra caardene.”
Serekê Baroyê Wanî Zulkuf Uçar: ”Armancê nê rayraşîyayîşî dewletêk a ke tede xoserîya hukmkerdişî, sîstemêko bihêz ê hukmî û krîteranê huqûqê mîyanneteweyî estê. Ma vera tarîtîye şinê. ”
Serekê Baroyê Riha Abdullah Oncel: ”Îqtîdar seba ke baroyan bêtesîr bikero nê sîstemî wazeno. Baroyî seba ke vera şîdetê cinîyan, îstîsmarê domanan seba heqanê merdiman rayîrî ra şinê. Seba serwerîya huqûqî şinê.”
