Derheqê birnayîşê elektrîkî yê 7 mengan ê cemxaneyo ke girêdayîyê Beşê PSAKDî yê Amedî yo, serekê Beşî Cafer Kolumanî ard ziwan ke rîyê birnayîşê elektîkî ra ê nêeşkenê cem girê bidê
Rixmê qeraro ke ‘cemxaneyî îbadetxane yê, faturayanê ci yê awe û elektrîkî dewlete dana’ hetê mehkeme ra bêro dayene zî, cemxaneyo ke girêdayîyê Komeleya Kulturê Pîr Sultan Abdalî (PSAKD) yê Amedî yo, 7 mengî yo rîyê deynê faturayan ra elektrîkê ci ameyo birnayene.
Serekê Pêroyî yê Komeleya Kulturê Pîr Sultan Abdalî (PSAKD) yê Amedî Cafer Kolumanî reaksîyon da na rewşe û ard ziwan ke, rîyê birnayîşî elektîkî ra ê nêeşkenê cem girê bidê û va: “Ma selahîyetdaran ra randevu girewt û do şorê. Eke elektîrîkê cemxaneyî nêro verdayene, ma do prosesê huqûqî bidê destpêkerdene.”
Kolumanî ard ziwan, na rewşe mojnena ma ke dewlete hîna cemxaneyan sey îbadetxane qebûl nêkena û va: “Verê cû zî na babete de qerarî ameyî dayene ke faturayê elektrîkî yê cemxaneyan hetê dewlete ra bêro dayene, no sebeb ra ma birnayîşê elektrîkî qebûl nêkenê. Cemxaneyî merkezê ma yê îbadetxaneyî yê. Tîya de salonê ma yê ke ma tede aktîvîteyanê kulturkî û cimatkîyan kenê estê, reyna morg esto. Rîyê birnayîşê elektîrkî ra ma wezîfeyanê xo yê bawerîye nêeşkenê bîyarê ca. Ma do selehîyetdaranê DEDAŞî de reyêka bîne pêvînayîşan bikerê. Eke qerarêko nêgatîf bivejîyo, ma na babete benê mehkeme û prosesê huqûqî do bidê destpêkerdene.” AMED
