Polîsan serê sibayî eşt bînaya Komeleya Keyeyanê Tepişteyan TUAY-DERî û keyeyanê îdarekaranê komele ser. Polîsan sereştişanê keyeyan û komele de bi mehneya ‘dosyayo nimite’ pê zorî berî akerdî û xeylê endam û îdarekarê komele dest bend kerdî.
Dadîya Çekdar Çubukî ke ewro serê sibayî netîceyê sereştişê keyeyî de ame tepiştene Netice Çubuke dîyar kerde ke polîsan demê sereştişê keyeyî de heqaret bi înan kerdî û înan tehdît kerdî. Çubuke daye zanayene ke polîsan fotografê lajê aye Çekwarî ke pêrodayîş de cuya xo vindî kerdo, dirnayî.
‘Fotografê lajê mi dirnayî’
Çubuke qala çîyê ke sereştişê keyeyî de qewimîyayî kerde û wina vate: “Mi înan rê vat ke vinderêne ez do berî akera. La ê berê keyeyî şikitî. Wexto ke mi ber akerde bi çekanê xo eştî keye ser. Sere de fotografê lajê mi yo ke şehîd bîyo, dirnayî û vatî ‘O ke geber bîyo no yo’. Her çî serûbin kerdî. Mi înan rê vat ‘Korona esto şima bi çekan kewenî keye’. Ê zî vatî ‘Vindere nê nê ma zanî ma senî to bidî vindetene’. Mi înan rê vat ‘Ez no zilmî qebul nêkena û ez şima hewaleyê Homayî kena’. Ê zî vatî ‘Şima Homa şinasnenî? Ti bawer kena ke Homa esto?’ no zilmêko pîl o. Ez no zilmî qebul nêkena.”
‘Ez do sere nêrona’
Çubuke dewamê qiseykerdişê xo de ard ziwan ke aye vera nê caardişan de do sere nêrona û wina dewam kerde: “Ez qetî vera na dewleta faşîstî de sere nêrona. Ê çiqas bêrî mi ser, ez do hende bi hêz biba. Ez peynîya doza lajê xo de ya. Ez do sere nêrona.”
‘No zilm êdî bes o’
Çubuke tewr peynî daye zanayene lajê aye Çekdar bi kelemçe ameyo tepiştene û va: “Çekdarê mi tepiştî. Wexto ke ma sebebê tepiştişî persayî ê vatî ‘Bize emir gelmiş’. Di serrî verê zî Çekdar ame tepiştene. 7 aşman tepişte mans û dima ra ame tehlîyekerdene. Psîkolojîyê domananê mi xira bîyo. Vatî ma keye de çîp gêrenî. Mi zî va, çîyêko winasî çin o. Fotografê domananê ma ra û ma ra tersenî. Ez wayîrê doza şehîdanê xo vejîyena. No zilm êdî bes o.” AMED
