Jîna Emînîya 22 serre 13ê êlule de Tehran de seba ke gijikê ci binê laçikî ra asayêne hetê ‘polîsanê exlaqî’ yê Îranî ra amebî qetilkerdene. 8 rojî yo vera qetilkerdişê Jîna Emînî çalakîyê protestoyî pêro Rojhelatê Kurdistanî û Îranî de yenê kerdene.
Torranê dîjîtalan de dîmenê çalakîyan bi taybetî dîmenê şaristananê Rojhelatê Kurdistanî ameyî vilakerdene.
Şaristanê Sine yê Rojhelatê Kurdistanî de sloganê ‘Cinîye, Cuye, Azadîye’ (Zen, Zendegi, Azadî) yeno eşnawitene. Rixmo ke hêzê Îranî bi guleyan hêrişê şarî keno, şar vera sloganê ‘dîktatorîye rê merg’ vano.
Şîno de şaristananê Pîranşar û Mehabadî de xoverdayîşê şarî ra dima hêzanê rejîmê Îranî xo bi temamî Şîno ra ant. Şaristan de merkezê Muxafizanê Şorişî rijîya. Şaristan de torrê têkilîye birîyayî û hêzanê tîmanê taybetan xeylêk kesî destbend kerdî.
Goreyê agahîyan têna Gîyalan de 60ê ci cinîyî 739 kesî ameyî destbendkerdene.
Şaristananê Şîraz, Rezcan û Newşehîrî de zî çalakîyî ameyî kerdene. Goreyê çimeyanê muxalîfan 31 eyaletan de, 139 şaristanan de çalakîyî vila bîyî. Heman çimeyan pare kerd ke çalakîyan de 140 kesî ameyê qetilkerdene û 5 hezar ra zêdeyêr kesî ameyê destbendkerdene.
Goreyê çimeyanê fermîyan çalakîyan de 39 kesî ameyê qetilkerdene. Rêxistina Heqanê Merdiman a Îranî (IHR) roja îneyî dabi zanayene ke tewr tay 50 kesî ameyê qetilkerdene.
Çimeyê muxalîfî pare kenê ke 21 noqtayanê Tehranî û şaristananê cîyayan de mabênê muxafizanê şorişî, elemananê îstîxbaratî û milîsanê Besîcî de pêkewtişî qewimîyenê.
Serekkomarê Îranî Îbrahîm Reîsîyî dima ke Amerîka ra agêra çalakîkerî tehdît kerdî.
Yewîya Şarî ya Îranî ya Îslamî ya ke hetê terefgîranê serekkomarê verênî Muhammed Hatemîyî ra ronîyaya, veng da ke mejbûrîya laçikan wa wedarîya, polîsîya exlaqî bêra wedaritene, derheqê qetilkerdişê Jîna de komîsyono bêteref wa bêro awankerdene û destbendkerdeyî wa cade bêrê veradayene.
