Dima ke cinîya kurde Jîna Emînî 16ê êlule de Tehran de hetê ‘polîsanê exlaqî’ yê Îranî ra amebî qetilkerdene serewedaritişê Rojhelatê Kurdistanî û Îranî dest pêkerdbi. Çalakîyanê Rojhelatê Kurdistanî û Îranî yê bi şîarê ‘jin, jiyan, azadî’ 94 rojî xo pey de verdayî. Pêroyê Rojhelatê Kurdistan û Îranî de vizêr grevo pêroyî dest pêkerd. Heme sendîka, komele û komê sîyasî yê Îranî û bajarê Rojhelatî seba 19, 20 û 21ê kanûne vengê grevê pêroyî kerdî. Yeno pawitiş ke grev hîra bibo. Badê vengdayîşê çalakîyan bajarê Rojhelatê Kurdistanî, Sine, Seqiz, Kamyaran, Dîwander, Eywan Xerb û xeylê bajaranê bînan de hemwelatîyan dikananê xo nêakerdî û kewtî grev.
Bajarê Bokan de cenazeya Mihemed Hacî Resul Purî ke pê îşkence hetê hêzê Îranî ra ameybî qetilkerdiş, bi sloganê ‘Şehîd nêmirenî’ ameye definkerdiş. Bajarê Mahabadî de zî merasîmê çewresî yê Fayeq Mamqadirî bi tewrbîyayîşê seyan kesan pê ame. Çalakwanan nêrazîbîyayîşê xo hemverê daliqnayîşî mojna û Tahran, Kirman û xeylê bajaranê bînan de esnafî dikananê xo nêakerdî.
Raşteyê Êkbatan û metroyê bajarê Tahranî de çalakî û rayraşîyayîşî ameyî viraştiş. Hemwelatîyî hemverê îqtîdarê Îranî de bê maben sloganan berz kerdî. Bajarê Reştî ke keweno Vakurê Îranî de bi serkêşîya cinîyan rayraşîyayîşêk girseyî pê ame. Dima ra ciwanan mîyanê raşteyî de adir tafînayî û dewleta Îranî şermizar kerdî. Herêma Gulşarî ya Kerecî de zî reyna hemwelatîyî raşteyan de bî û nêrazîbîyayîşê xo ardî ziwan ser.
Vera kiştiş, daliqnayîş û destbendkerdişan serewedarnayîşê Rojhelatê Kurdistan û Îranî bê maben dewam keno.
