14ê nîsane ra nata artêşa tirke ya îşxalkere vera Zapî operasyonê îşxalî kena. Zap de dişmen tewr zaf hêrişê Warê Xoverdayîşî yê Çemçoyî kerd. Girê Kelaya Çemçoyî her roje bi tank, obus, çekanê giranan û teyarayanê şerî yeno hedefkerdene la rixmê ney zî tede xoverdayîş dewam keno.
Çemço de herêmê stratejîkî yê sey Werxelê, Şehîd Adil, Karker, Şehîd Şahînî cagênê. Coka wexto ke artêşa îşxalkere hêrişê înan kerd Kelaya Çemçoyî pawitişê peyê înan de rolêko girîng kay kerd. Leşkeranê tirkan seba kontrolkerdişê nê girî xîret kerd la gerîlayan vera ney çalakîyê bitesîrî kerdî. Performansê leşkerîye yê gerîlayanê Kelaya Çemçoyî bîyo wayîrê kedêka pîle. Gerîlayanê tîya hem xoverdayîşê giranê nêzdîyan koordîne kerdî hem zî bi çalakîyanê xo paştî daye embazanê xo.
Herêma Çemçoyî roja verêne ra nata destêko pîl da xoverdayîşê waranê Werxelê û Şehîd Şahînî. Girê Kelaya Çemçoyî de cayo ke nêdîyayo bombayan ver nêmendo. Gerîlayan tîya de seba ke dişmen çeka kîmyewîye vera embazanê înan ê waranê bînan nêşuxilno binê hêrişanê çetinan de çalakîyî kerdî.
Seke dîmenanê peyê çalakîye de zî aseno artêşa îşxalkere bi tank, çekanê giranan û obusan hêrişê Keleya Çemçoyî kena. Vera yew guleyê gerîlayan artêşa îşxalkere bi tonan bombayanê giranan şuxilnena û na raştîye hetê kameraya gerîlayan ra qeyd bena.
Temmuze de artêşa îşxalkere derbazê waranê xoverdayîşî yê Çemçoyî bîye. Artêşa îşxalkere tîya de bi metodanê gemarinan hêrişê tunelanê şerî yê Şehîd Umîtî kerd. Nê tunelan de komêka gerîlayan di mengan vera tank, gazanê kîmyewîyan û vendayîşê teslîmbîyayîşî xo ver da. Leşkerê tirkî bi tankan ameyî verê nê tunelan la nînan ra bi desan leşkerî merdî.
Çeperê Çemçoyî yo bîn tunelê şerî yê Şehîd Arjînî bi. Tîya de zî di mengan gerîlayan vera hêrişanê bêexlaqan xo ver da. Gerîlaya YJA-Starî Çîya Rûbar (Duçeme Çelîk) serkêşîya nê xoverdayîşî kerde la netîceya teqaberanê qedexekerdeyan û gazanê kîmyewîyan de şehîd bîye. Embazanê ci çeka aye erd de nêverda. Menga tebaxe de gerîlayê tunelanê Şehîd Arijînî çalakîya xo ra dima şîyî serê cenazayanê leşkeran û dest na çek û hacetanê înan ser.
Artêşa tirke plan kerd ke Çemço bivisna destî la pê xoverdayîşê gerîlayan nêeşkaye. Nîsane ra nata nê 9 mengan de Çemço de xeylêk skorsky û kobrayê dişmenî Çemço de ameyî derbkerdene. Artêşa îşxalkere 24 saetan Çemço da bombayan ver û qirkerdişêkê xoza yo pîl kerd. Gerîlayî 9 mengî yo çeperanê Çemçoyî de xo ver danê. Gerîlayî her roje vera hêzanê îşxalkeran çalakîyan kenê.
