Serdozgeriya Komarê ya Bûrsayê serlêdana malbata Ocalan û malbatên sê girtiyên din a ji bo hevdîtinê, red kir. Dozger hinceta redkirinê jî weke biryara dadgehê ya di 22’yê nîsanê de nîşan da
Birayê Rêberê Gelê Kurd Abdullah Ocalan, Mehmet Ocalan û wasiyê wî Mazlum Dînç duh ji bo hevdîtina bi Ocalan re, bi rêya parêzeran serî li Serdozgeriya Komarê ya Bursayê dan. Lê Serdozgeriyê serledana malbatê red kir.
Malbatên Hamîlî Yildirim, Omer Hayrî Konar û Veysel Aktaş jî bi rêya parêzerên xwe serî li heman dozgeriyê dabûn. Serdozgeriyê serlêdana her sê malbatan jî red kir.
Hat zanîn ku dozger bi hinceta biryara dadgehê ya di 22’yê nîsanê de hatibû dayîn, serlêdana malbatan red kir.
Hêjayî bibîrxistinê ye ku Mehmet Ocalan herî dawî di 12’ê çileyê û di 5 hezîranê de bi birayê xwe re hevdîtin kiribû. Malbatên Aktaş, Konar û Yildirim jî di 5’ê hezîranê de hevdîtin kiribûn. STENBOL
