Navenda Nûçeyan
Nerazîbûnên li dijî girtina Hevseroka Kongreya Civaka Demokratîk (KCD) Leyla Guven her ku diçe zêde dibin. Seroka Koma Tevgera Goran a li Parlamentoya Başûrê Kurdistanê Gulistan Seîd wiha got: “Girtina Leyla Guven binpêkirina pîvanên demokrasî û mafên mirova ne. Ev kiryarên dewleta tirk berovajî propaganda wê ya ku dibêje li Tirkiyeyê demokrasî heye.”
Gulistan Seîd, Leyla Guven wek mînaka jina azad a kurd bi nav kir û wiha domand: “Leyla Guven yek ji têkoşerên netewa me ye ku ji bo bidestxistina mafên mirov di girtîgehê de demek dirêj ket greva birçîbûnê. Lê li şûna ku piştgiriya jinên wisan were kirin, berovajî astengî jêre tên derxistin û tên cezakirin.”
Gulistan Seîd destnîşankir ku wê bi girtin û îşkenceyê nikaribin pêşî li têkoşîna jina kurd a di qada siyasetê de bigrin. Wê bi dehan jinên din ên kurd têkoşîna Leyla Guven berdewam bikin.
