Çalakiya rûniştinê ya li dijî tayînkirina qeyûm a li Amedê di roja 9’an de berdewam kir. Îro Serok û Hevserokên DÎSK, KESK, TTB û TMMOB’ê tev li çalakiya li Amedê bûn. Seroka Giştî ya DÎSK Arzu Çerkezoglû, tayînkirina qeyûm wekî “darbe” pênase kir û wiha got: “Armanca darbeyê bi milyonan kes in.”
Çalakî û nenarizûbên li dijî tayînkirina şaredariyên HDP’ê yên Amed, Mêrdîn û Wanê di roja 9’an de berdewam dikin. Li Amedê di roja 9’emîn de dîsa parlamenter, hevşaredar û rêveberên HDP’ê li Kolana Lîse kom bûn û çalakiya rûniştinê berdewam kirin. Dîsa polîsan girse dorpêç kir û destûr nedan ku bi girseyi daxuyaniyê bidin çapemeniyê. Di çalakiyê de hevşaredar, parlamenter hevserokê PSK, Mesud Tek Şaredarê Dersimê Fatih Mehmet Maçoglu Serok û Hevserokên DÎSK, KESK, TTB û TMMOB’ê jî tev li çalakiya li Amedê bûn.
Di çalakiyê de dowîzên “Ne qeyûm em bajarên dostên zarokan dixwazin”, “Em çima hatin kuştin? li Pirsûs, Eneqe û Amedê” vekirin. Parlamenterê HDP’ê yê Stenbolê Zeynel Ozen, li dijî bêbextiya Serokomar Tayyîp Erdogan a “Pereyan dişîne çiyê” got: “Nelirêtî û diziya wan di çapemeniyê de belav bû. Nelirêtiyên qeyûm hemû dinya alemê dît. Bedela wê çi dibe bila bibe em serî natewînin û em ê li ber xwe bidin.”
Dema çalakiyê bi stranan dewam dikir, Seroka Giştî ya DÎSK’ê Arzu Çerkezoglu, Hevserokê Giştî yê KESK’ê Mehmet Bozgeyik, Serokê Konseya TTB’ê Raşît Tukel, Serokê TMMOB’ê Selçuk Uluata û nûnerên sendîkayan hatin Kolana Lîse û çalakger ziyaret kirin. Hevserok û nunerên sendîka meşiyan qada ku pankarta “Dest nede vîna min” vekiribûn û li vir axivîn. Serok û nûnerên sendîkayan bi dirûşmeya “Qeyûm wê hesab bidin gel”, “Li dijî Faşizmê mil bidin mil” û “Kurdistan wê ji faşizmê re bibe goristan” berz kirin.
PSK: Em li cem gelê xwe ne
Serokê Giştî yê PSK’ê Mesud Tek, diyar kir ku tayînkirina qeyûm êrîşa li dijî vîna gel e û wiha got: “Em vê polîtîka AKP’ê şermezar dikin. Em ê li cem gelê xwe cih bigirin. Qeyûm ne tenê li dijî gelê Amedê li dijî vîna hemû gelan e.”
Berdevkê Platforma Ked û Demokrasiyê ya Amedê Dogan Hatun jî diyar kir ku bi tayînkirina qeyûm dixwazin Tirkiye têxin nava şer û wiha got: “Em bang li gelê tirk dikin ku di nava piştevanî û şêwirmendiyê de bin.”
Çerkezoglu: Ev xezpa vîne û dizî ye
Seroka Giştî ya DÎSK’ê Arzu Çerkezoglu jî anî ziman ku tayînkirina qeyûm a Şaredariyên HDP’ê darbeya li dijî vîna gel e û wiha got: “Darbeya li dijî demokrasiyê ye. Vîna gel aşkere xesp kirine. Hedef û armanca vê darbeyê vîna milyonan gel e. Dixwazin vîna milyonan a 4 aliyên Tirkiye ku li dijî faşizmê serî hildide tune bikin.”
Maçoglu: Wijdanê me li vir e
Şaredarê Dersimê Fatih Mehmet Maçoglu jî xwest li dijî qeyûman gel bibin yek û bi hevre têbikoşin û wiha got: “Ev 9 rojin ku em ne li vir bin jî wijdanê me li vir e, li Wan û Mêrdîn e. Ji niha û şûnde jî dê wijdanê me li vir be.”
Girsê piştî daxuyaniyê bi dirûşmeyan dawî li çalakiyê anîn. AMED
